మౌనమే నీ భాష ఓ మూగ మనసా..!

మౌనం.. అంటే నిశ్శబ్దం....కానీ మౌనంలోనే చాలా భావాలు, ఎన్నెన్నో అర్ధాలు ఉంటాయి. అందుకే మౌనాన్ని మించిన భాష గానీ, భావవ్యక్తీకరణ గానీ మరొకటి లేనే లేదు. ప్రపంచంలో ప్రతీ ఒక్కరికీ సుపరిచితమైన ఏకైక భాష మౌనం. మౌనంగా ఉండడం తెలియని వాడికి ఎలా మాట్లాడాలో కూడా తెలియదంటారు.
ఒక్కోసారి మౌనంలో ఉన్నంత ఆనందం ఎక్కడా లేదనిపిస్తుంది. ఒక చల్లని వెన్నెల రేయిలో ఆకాశంలో నక్షత్రాలను చూస్తూ ఉంటే మౌనంగానే ఉండాలనిపిస్తుంది. ఏదైనా సవ్వడి చేస్తే ఆ అపురూపమైన భావమేదో జారిపోతుందేమోననిపిస్తుంది. వేసవి సంధ్యా సమయంలో చల్లగాలికి ఊగుతూ ఉండే ఆకులనూ, సుగంధాన్ని వెదజల్లే మల్లెలనూ, జాజులనూ చూస్తూ ఉంటే... ఆ మౌనంలో ఏదో తెలియని మధుర సంగీతం వినిపిస్తుంది. శీతాకాలం ఉదయాన్నే పూల రెక్కలపైనా, ఆకులపైనా నిలిచిన మంచుబిందువులపైన బాలభానుని కిరణాలు ప్రసరించినప్పుడు కనిపించే అందం చూస్తూ ఉంటే మౌనంగానే ఉండాలనిపిస్తుంది.
మనకి ఎంతో ప్రాణప్రియమైన వ్యక్తి ఎదురుగా ఉన్నప్పుడు ఎన్నో వేలమాటల్లో చెప్పలేని భావాన్ని మన మౌనం మాత్రమే సరిగ్గా వ్యక్తపరచగలుగుతుంది . అలాగే మనం ఎంతో ఆప్తులయిన స్నేహితులని విడిచి దూరంగా వెళ్తున్నప్పుడు కూడా మౌనమే శరణ్యమౌతుంది. మనసుకి ఎంతో ఆవేదన కలిగినప్పుడూ, ఆనందం కలిగినప్పుడూ, జీవితంలో కీలక నిర్ణయాలు తీసుకునే సమయంలోనూ, ఇలా జీవితంలో ప్రతీ మలుపులోనూ మనం తప్పకుండా మౌనాన్ని ఆశ్రయిస్తాం. మనం అయోమయ పరిస్థితుల్లో (confusion) ఉన్నప్పుడు కాసేపు మౌనంగా ఉంటే మన మనసు తేలికపడి స్వచ్ఛమైన ఆలోచనలు (clear ideas) వస్తాయి.


ఒక రకంగా మౌనం లేని జీవితమే మనకి లేదు. అసలు మౌనంలో ఉన్నప్పుడే మనలోని మనల్ని వీక్షించే అవకాశం కలుగుతుంది. మన గురించి మనం ఆలోచించుకునే వీలుంటుంది. మౌనంగా ఉండడం కూడా ఒక hobby లాగ అలవాటు చేసుకుంటే బావుంటుంది. అప్పుడు ఈ యాంత్రిక జీవనంలో మన మనసు ఏమంటుందో వినిపించుకోవడానికి కాస్త వీలు చిక్కినట్టవుతుంది. మనసుకి ప్రశాంతతను అందివ్వాలనుకుంటే మనం ఎక్కడికో వెళ్ళనవసరం లేదు. మన గదిలోనే కాసేపు మౌనాన్ని ఆశ్రయిస్తే చాలు. వితండంగా వాదించేవాళ్ళని మౌనంతో మాత్రమే గెలవగలం.
దైవాన్ని కనుక్కోవాలంటే అది మౌనంలోనే సాధ్యం అంటారు. ఎందుకంటే దేవుడికి మౌనమే ప్రియం. దైవసృష్టి అయిన ఈ ప్రకృతిలోని మొక్కలు, పూవులు, నక్షత్రాలు, చందమామ...అన్ని మౌనంలోనే ఉంటాయి. మౌనంగా ఉన్నప్పుడే మనలోని అంతరాత్మనీ, ఆత్మనీ, పరమాత్మనీ స్పృశించగాలుగుతమని ఎంతోమంది గొప్పవాళ్ళు చెప్పారు. మౌనంతోనే ఎంతో శక్తి, ఓరిమి కూడా వస్తాయి.

మౌనం గురించి కొన్ని మంచి వాక్యాలు ఇక్కడ ఉంచుతున్నాను. చూడండి ఎంత బావున్నాయో..!
-->

“Silence is the true friend that never betrays.”

-->

-->

“The best answer to anger is silence.”

“Saying nothing...sometimes says the most.”

“Let us be silent, that we may hear the whispers of the gods.”

“Silence is sometimes the answer.”

“We must have reasons for speech but we need none for silence.”

సరే మరి..ఈ వారాంతపు సెలవులని బాగా ఆనందించండి. అలాగే వీలుంటే ఇంత అపురూపమైన మౌనాన్ని కాసేపు ఆస్వాదించండి.

మళ్లీ కలుద్దాం.

ప్రేమతో..

మధుర వాణి