Wednesday, March 31, 2010

ఎక్కువమంది కోరుకునే ఉద్యోగం ఏది?


ప్రతీ మనిషికీ బ్రతుకు తెరువు కోసం ఏదో ఒక పని చేయక తప్పదు. బ్రతుకు తెరువు కోసం వెతుక్కునే అవసరం లేని అతి కొద్ది మంది ధనవంతులకి కూడా ఊసుపోడానికైనా ఏదో ఒక ఉద్యోగం చేసి తీరాలి. ఇంత పెద్ద ప్రపంచంలో మనం చేయాలనుకోవాలే గానీ ఎన్ని రకాల ఉద్యోగాలో ఉన్నాయి. అయితే ఆసక్తికరమైన విషయమేంటంటే, 'పుర్రెకో బుద్ధి జిహ్వకో రుచి' అన్నట్టు ఒక్కొక్కరిది ఒక్కో ఆసక్తి. ఆసక్తి ప్రకారం ఉద్యోగాన్ని ఎంచుకునే వారు కొందరైతే, మన చుట్టూ ఉన్న సమాజాన్ని అనుసరించి లాభనష్టాలు బేరీజు వేసుకుని, ధనం, కీర్తి పరంగా ఏది ఎక్కువ లాభాదాయకమో బాగా లేక్కలేసుకుని ఉద్యోగం చేయడం. మన దేశంలో, మరీ ముఖ్యంగా మన రాష్ట్రంలో రెండో రకానికి చెందినవారే ఎక్కువ మంది ఉంటారని నా అభిప్రాయం ;-)

సరే, విధంగానైనా సరే ఎక్కువమంది ప్రజలు మొగ్గు చూపే ఉద్యోగాలు ఏవి? పని చేయడానికి, లేదా హోదాలో ఉండటానికి జనాలు మక్కువ చూపిస్తున్నారు? అనే విషయాలు చాలా ఆసక్తికరంగా ఉంటాయి. ఇలాంటి సర్వేలు ప్రతీ దేశంలో, ప్రతీ రాష్ట్రంలో చేస్తే ఒక్కోచోట ఒక్కో రకమైన జాబితా తయారవుతుంది కాబోలు! జాబితాని బట్టి ఆయా దేశాల్లో ప్రజల ఆలోచనా విధానం, మనోభావాలు, అక్కడి సామాజిక పరిస్థితులు తదితర విషయాల గురించి ఒక అవగాహనకొచ్చే వీలుంటుంది కదా!

ఇలాంటి ఒక సర్వేని జర్మనీ లో నిర్వహించారట. కాకపోతే, వాళ్ళు సర్వే చేసిందేమిటంటే, అత్యధిక శాతం మంది ఇష్టపడని ఉద్యోగాలు ఏంటీ అని! జర్మనీ వాళ్ళు చేయడానికి ఇష్టపడని టాప్ టెన్ ఉద్యోగాల జాబితా ఇలా ఉంది.

1. ఇన్సూరెన్స్ ఏజెంట్
2. రాజకీయ నాయకుడు
3. సుదూరాలు డ్రైవ్ చేసే ట్రక్ డ్రైవర్లు (మన లారీ డ్రైవర్ల లాగా)
4. రోడ్ స్వీపర్ (రోడ్లో చెత్త ఊడ్చే పని)
5. రైతు, వ్యవసాయదారుడు
6. ఎలిమెంటరీ స్కూల్ టీచర్
7. దాసీ పని (హౌసు-కీపింగ్, ఇంట్లోనో, ఆఫీసులోనో ఒకరి చేతి కింద ఉండి క్లీనింగు పనులు వగైరా చూడటం)
8. బ్యాంకు ఉద్యోగి
9. డాక్టర్
10. జర్నలిస్టు

జర్మనీ లో రోడ్లు ఊడ్చే పనికి కూడా మిగతా వాటిలాగా బాగానే డబ్బులొస్తాయి కాబట్టి, ఇక్కడ జనాలు కేవలం తమ ఆసక్తి తగ్గట్టే ఉద్యోగాలు చేస్తుంటారు కానీ పైన చెప్పినట్టు మనలాగా రెండో రకానికి చెందిన వాళ్ళు కొంత తక్కువ అని నా ఉద్దేశ్యం. ఏదేమైనా జర్మన్ల లిస్టులో "డాక్టరు, బాంకు ఉద్యోగం, ఎలిమెంటరీ టీచరు, రాజకీయ నాయకుడు" ఉండటం నాకు ఆశ్చర్యాన్ని కలిగించింది. మనకైతే అవన్నీ కూడా మాంచి డిమాండున్న ఉద్యోగాలు కదా మరి! మన దేశంలో డాక్టరైతే ఎంచక్కా పది చేతులా డబ్బు సంపాదించచ్చు. కానీ, ఇక్కడ పాపం అలా అడ్డ దిడ్డంగా దోచుకునే అవకాశం ఉండదు డాక్టర్లకి. పైగా డాక్టరు చదువూ, వృత్తీ కూడా బోలెడు కష్టం, శ్రమతో కూడుకున్నవి. అందుకే వీళ్ళు దానికి 'నో' చెప్పారని అనిపిస్తోంది. ఇకపోతే రాజకీయ నాయకుల విషయంలో కూడా దాదాపు ఇదే వర్తిస్తుంది. అదీ కాక, మన దేశంలో రాజకీయ నాయకులవ్వాలంటే 99% మన పుట్టుకతోనే జరిగిపోవాలి కదా మరి ;-) ఇహ మిగతా బ్యాంకు ఉద్యోగాలూ, టీచరు ఉద్యోగాలూ.. వీటిల్లో కూడా సర్కారు వారి ఉద్యోగాలకైతే మన దేశంలో ఎంత డిమాండో చెప్పక్కర్లేదుగా. మనలో మన మాట.. మన రాష్ట్రంలో చాలా మంది అబ్బాయిలు ఎంచక్కా బోలెడు కట్నం వస్తుంది, పైగా సర్కారీ కొలువుల్లో పెద్దగా పని చేసే అవసరం లేకుండానే డిచిపోతుందని.. వీటికే మొదటి వోటు వేస్తారు కదూ! ;-) ఇహ పైన జాబితాలో మిగతా వాటి సంగతి చూస్తే, తక్కిన వాటితో పోలిస్తే అవి కాస్త శ్రమ ఎక్కువ ఉండే ఉద్యోగాలు గనక 'నో' చెప్పారని అనిపిస్తోంది.

సరే, జర్మనీ సంగతెలా ఉన్నా... పై జాబితా వివరాలు చూడగానే మన రాష్ట్రంలో, దేశంలో యీ సర్వే చేస్తే జాబితా ఎలా ఉంటుందా అనే ఆలోచన వచ్చింది నాకు. ఇష్టపడనివీ, ఇష్టపడేవీ రెండు రకాల సర్వేలు చేస్తే ఎలా ఉంటుదంటారూ?

ప్రస్తుత పరిస్థితుల్లో మన రాష్ట్రంలో జనాల అభిప్రాయం ఎలా ఉండచ్చో నేనూహించి లిస్టు రాస్తున్నా. మీరు కూడా తలా చెయ్యి వెయ్యండి ;-)

ఇష్టపడే ఉద్యోగాలు:


1. అమెరికా ఉద్యోగం ;-)
2. సాఫ్ట్ వేర్ ఇంజనీరు
3. గవర్నమెంటు ఉద్యోగం (టీచరు, బ్యాంకరు, ఏదైనా సరే!)
4. డాక్టరు
5. ఇంజనీరు
6. రియల్ ఎస్టేటు
7. రాజకీయం ( రాజకీయ నాయకుడి ఇంట్లోనో పుడితేనో, లేకపోతే దూరే సందు దొరికితేనో ;-)
8, 9, ..............


ఇష్టపడని ఉద్యోగాలు:

1. వ్యవసాయం
2. పల్లెటూర్లో పని చేయాల్సొచ్చే ఉద్యోగాలు
3, 4, 5...

ప్చ్... సమయానికేమీ తట్టట్లేదు... ఇహ మీరందుకోండి ఇక్కడ నుంచి ;-)


Wednesday, March 24, 2010

చందమామతో ఊసులు!


సాయంకాలం పూట కాసేపలా కలిసి నడుద్దామని అనుకున్నాం తనూ, నేనూ. కానీ, సరిగ్గా సమయానికి ఏదో కొంపలు మునిగే పని వచ్చి పడిందని చివరి నిమిషంలో నాతో రాకుండా చేతులెత్తేసిన తన మీద కాస్తంత కోపంతో ఒంటరిగానైనా సరే కాసేపలా నడుద్దామని నేనొక్కదాన్నే బయలుదేరాను.

అప్పుడప్పుడే
ముసురుకుంటున్న చీకటి తెరలు అంతదాకా పరుచుకుని ఉన్న వెలుగుని పారద్రోలే పనిలో హడావిడిగా ఉన్నాయి.

'ఏంటోయ్.. మొహం అలా చిన్నబుచ్చుకున్నావ్? ఎందుకంత విసుగు?' అన్నారెవరో నాతో.

అసలే విసుగులో ఉన్నానేమో.. 'ఏదో లేవోయ్.. అసలే ఒంటరిగా నడవాల్సొచ్చిందని నేను చింతిస్తుంటే.. మధ్యలో నీ గొడవేంటి?' అన్నాను తిరిగి.

'ఒంటరిగానా..ఎంత మాట! నేను తోడుగా ఉండగానే!?' అని మరో ప్రశ్న వినిపించింది.

'అన్నట్టు.. నేను ఒంటరిగా నడుస్తున్నాను కదూ! మరి నాతో మాట్లాడుతోంది ఎవరా?' అని సందేహమొచ్చి ఒక క్షణం ఆగి చుట్టూ చూసాను. నా దరిదాపుల్లో నడిచే వాళ్ళెవరూ కనిపించలేదు.

'అరె.. ఇక్కడెవరూ లేరే!' అనుకుని ఆశ్చర్యపడేంతలో 'దిక్కులు చూస్తావేం చెలీ.. నేనిక్కడుండగా!' అని వినిపించింది.

గభాల్న తలెత్తి ఆకాశంకేసి చూసాను. చిలిపిగా చిరునవ్వులు చిందిస్తూ చందమామ నాకేసి చూస్తున్నాడు.

'హన్నా! ఇందాకటి నుంచీ నువ్వా నాతో మాట్లాడేదీ.?' చిరుకోపంగా అడిగాను.

'నేనే చెలీ! ఒంటరిగా నడవాల్సొస్తుందని బెంగ పడుతున్నావు కదా.. అందుకే నీతో కలిసి జంటగా నడుద్దామని వచ్చాను' అన్నాడు.

'ఎక్కడో ఆకాశంలో సుదూరంగా ఉన్న నువ్వు నాకు జంటవా.? పోదూ బడాయి' అని నవ్వాన్నేను.

అంతదాకా అల్లరిగా నవ్వుతున్న చందమామ కాస్తా మొహం ముడుచుకుని చటుక్కున తన పక్కగా తరలిపోతున్నపెద్ద మబ్బు కొంగు చాటున దాగాడు.

'సరే సరే... ఒప్పుకుంటున్నా.. నువ్వే నాకు సరైన జోడీవని... ఇంతకీ నాతో కలిసి నడుస్తావా లేదా? కాస్త అలక మానుకుని నా కళ్ళకి కనిపించరాదూ.. కాసేపు కబుర్లు చెప్పి మురిపించరాదూ..' అంటూ కాసేపు బతిమాలీ, బామాలాక 'అలా రా దారికి..' అంటూ అల్లరిగా నవ్వుతూ మబ్బు చాటు నుంచి మళ్ళీ ఆకాశంలోకి వచ్చాడు చందమామ.

'నిన్నలా ఆకాశంలో చూస్తుంటే ఎంత బాగుంటుందో తెలుసా!? నిన్ను నా దోసిట్లో నింపాలనిపిస్తుంది. ప్చ్..కానీ ఏం చేయను? నువ్వేమో కళ్ళెదుట కనిపిస్తూనే నాకందనంత ఎత్తులో ఉంటావ్ ఎప్పుడూ!'

'అబ్బా.. ఎంతాశ! నన్ను అందుకుందామనే!'

'ఎంత బడాయి! అల్లంత దూరాన ఆకాశంలో ఉన్నావనేగా! నే తలుచుకుంటే నిన్ను నా దగ్గరికి రప్పించగలను తెలుసా!?'

'ఔరా.. నీదెంత బడాయి! నన్ను భూమ్మీదకు దించుతావా! ఏదీ..దించు చూద్దాం!' అంటూ కవ్వించాడు.

వెంటనే ఉక్రోషంగా నేను నడుస్తున్న దోవ పక్కనే ఉన్న కొలను దగ్గరికెళ్ళాను. కొలనులోని నీళ్ళపై మెరుస్తూ వయ్యారంగా తేలుతున్న చంద్రబింబాన్ని నా దోసిట్లో నింపి ఆకాశంకేసి చూపాను.

'చూసావా.. నిన్ను భూమ్మీదకి రప్పించడమే కాకుండా, నా దోసిట్లో ఎలా నింపానో! కావలిస్తే నువ్వే కాస్త పరికించి చూడు.. నా దోసిట్లో నీళ్ళలో నువ్వున్నావో లేదో!'

సమాధానంగా చందమామ సన్నగా నవ్వుతూ 'నా ప్రతిబింబం నేనవుతానా?' అన్నాడు.

'ఏదీ నీ చేతనైతే నా ప్రతిబింబమైనా సరే నువ్వు అందుకో చూద్దాం!' అన్నాన్నేను సారి కాస్త చురుగ్గా.

'హన్నా! సున్నితంగా, సుకుమారంగా కనిపిస్తుంటే పూబాలవనుకున్నాను గానీ, నువ్వు అసాధ్యురాలివే! నీ గడుసుదనానికి ముచ్చటేస్తోంది బంగారూ!' అంటూ కాసేపు నాపై మురిపాలారబోశాడు.

'అవునూ.. నేను ఒంటరిగా నడుస్తున్నానని నాకు తోడొచ్చావు సరే! మరి నీకొక్కడికే ఒంటరిగా అనిపించదూ?' అడిగాన్నేను.

'నీలాంటి ముద్దులు మూటగట్టే నెచ్చెలులు ఎందరో ఉండగా నేనొక్కడినే ఒంటరిగా ఎక్కడున్నానూ?' అన్నాడు కొంటెగా.

'కానీ, ముద్దుల మూటలన్నీ అల్లంత దూరంలో ఉండి నీ చేతికందవే! అప్పుడెలా పాపం?' అంటూ కాస్త ఉడికించాను.

'ఆకాశంలోనైనా నేనొంటరిగా ఎక్కడున్నాను? ఎప్పుడూ జంటగానే ఉంటానుగా!'

'ఎవరమ్మా నీకు జంట? ఎప్పుడూ ఏదో పనున్నట్టు హడావిడిగా పరుగులు తీస్తూ కదలిపోయే మబ్బులా?'

'కాదు బంగారూ! కాసేపాగితే నువ్వే చూద్దువు గానీ.. నాకెంత మంది ప్రియసఖులున్నారో!'

'ఎవరా?' అని నేనాలోచించేంతలో తనే అందుకున్నాడు 'ఇదిగో చూడు నా ప్రియసఖి వేంచేసింది' అంటూ.

తీరా చూద్దును కదా.. ప్రియసఖి ఎవరో కాదు మిణుకు మిణుకుమంటూ మెరుస్తున్న చిన్ని తార.. ఇంతలో ఎప్పుడొచ్చి చేరిందో మరి చందమామ సరసన!

నేను అబ్బురపడుతూ వారిరువురినీ చూస్తుండగానే చందమామ చెప్పసాగాడు.

'ప్రతీ నిశి రాత్రీ నక్షత్ర భామలు వయ్యారంగా మెరుపులద్దుకుని తమ అందాన్ని తీర్చిదిద్దుకుని తీరిగ్గా వేంచేసేసరికి ఇదిగో వేళవుతుంది. ఇప్పటికి చిన్ని తార ఒహటే దర్శనమిచ్చింది. మిగతా భామల కోసం మరి కాసేపు పడిగాపులు కాయాల్సిందే. తప్పదు మరి! అయినా, భామల సంగతి నీకు చెప్పడమా! నీకు తెలియని ఊసా ఇది. నువ్వూ గూటి పక్షివే కదూ!' అంటూ అల్లరిగా నవ్వేశాడు.

'సరే సరే.. మా ఇల్లొచ్చేసింది. ఇహ నేను వెళ్తాను బాబూ! నీ నిశీధి విహారం జంటగా నువ్వు కొనసాగించు. ఇవాళ్టికి నాకు తోడుగా వచ్చినందుకు నీకు ముద్దులు మూట గట్టి ఇస్తానులే!' అని నవ్వుతూ వచ్చేశాను.