Tuesday, April 28, 2009

జర్మన్ బాయ్ ఫ్రెండ్-గర్ల్ ఫ్రెండ్ కబుర్లు

జర్మనీలో చాలా రోజులనుంచి ఉంటున్నాను కాబట్టి, నేను చూసిన కొన్ని బాయ్ ఫ్రెండ్-గర్ల్ ఫ్రెండ్ కబుర్లు చెప్తాను. ముందుగా.. నేను ప్రత్యక్షంగా చూసిన కొన్ని విచిత్ర బంధాలు (మీకు కూడా అలానే అనిపిస్తాయి చూడండి) ఒక్కోటి చెప్తాను. తరవాత చివరగా నా విశ్లేషణ (అంటే నా అభిప్రాయం) చెప్పి ముగిస్తాను.


ఒకరోజు మా అపార్ట్మెంట్ ముందు నిలబడి మాట్లాడుతున్నాము నేనూ, మరో ఇద్దరు స్నేహితులు. ఎండాకాలం కాబట్టి కాస్త అలా బయట తీరిగ్గా నుంచుని మాట్లాడుతున్నాము. అప్పుడే ఒక జర్మన్ అబ్బాయి, అమ్మాయి (అదేనండి ప్రస్తుత కథలో వాళ్ళే వీరో-వీరోయినునూ..) బయటకొస్తున్నారు ఎదురింట్లోనుంచి. అమ్మాయి చేతిలో ఒక పెద్ద కుక్క కూడా ఉంది. వాళ్ళెక్కడికో బయలుదేరే ప్రయత్నంలో ఉన్నట్టు అనిపించింది. ఈలోపు అబ్బాయి 'డార్లింగ్.. మనం హాయిగా బయటికి షికారెళ్దాం అనుకున్నాం కదా.. మధ్యలో కుక్క ఎందుకు' అన్నాడు. వాళ్ల పరిస్థితి చూస్తుంటే కుక్క సదరు గర్ల్ ఫ్రెండ్ గారాల పట్టి అనీ, ఇతగాడికేమో కుక్క మీద పెద్దగా ఆసక్తి లేదనీ అనిపించింది. అమ్మాయేమో కావాలంటే నీతో రావడం మానేస్తాను గానీ, నా బుజ్జి కుక్కని మాత్రం వదిలి వచ్చే ప్రసక్తే లేదు అంది. దానికి అబ్బాయి 'నాకంటే తొక్కలో కుక్కే నీకు ఎక్కువా' అన్నాడు. అంతే.. అయిపోయింది. ఇంక చూస్కోండీ.. అమ్మాయి ఒక రేంజ్ లో వేస్కుంది అబ్బాయిని. నువ్వెంత నీ బతుకెంత.. నిన్న గాక మొన్నొచ్చావు, మహా అంటే.. ఇంకో రెన్నెళ్ళు ఉంటావు. నువ్వు కాకపోతే ఇంకో గొట్టం గోపాల కృష్ణ.. అంతే గానీ.. నా కుక్కని ( అమ్మాయి కుక్క అనలేదు దాని పేరేదో ఉంటుందిగా టామీనో, రామీనో..) నాతో తీసుకురావద్దంటావా.. అంతే కాక తొక్కలో కుక్క అంటావా.. బ్రేక్ అప్.. అంది. అబ్బాయేమో.. అయితే ఏంటి, తొక్కలో కుక్కతో పాటు ఉన్న నువ్వు కాకపోతే ఇంక అమ్మాయిలే కరువా ఏంటి.. నేను కూడా బ్రేక్ అప్.. అన్నాడు. అంతే.. సింపుల్ గా పదే పది నిమిషాల్లో వాళ్ల విచిత్ర బంధానికి (బంధం అనడం కూడా అనవసరమేమో..) 'ది ఎండ్' పడింది. ఇలాంటి సందర్భాల్లో ఇంకో చిత్రమైన మలుపేంటంటే.. ఒక రెండు మూడు రోజులయ్యాక, ఇద్దరూ మళ్ళీ మాట్లాడుకుంటారు. మొన్న అలా జరిగింది కదా, ఏమైనా మనిద్దరి అభిరుచులు కలవకపోవడం వల్లే అలా జరిగింది. లైట్ తీస్కుందాం.. 'లెట్స్ బి ఫ్రెండ్స్' అనుకుంటారు. నేనివాళ డిస్కోకి వెళ్తున్నాను కొత్త బాయ్ ఫ్రెండుని వెతుక్కోవడానికి, నువ్వూ రారాదూ..అంటుంది అమ్మాయి. మరి అక్కడ నుంచి మరో ప్రహసనం మొదలు.


మరో సంఘటన చెప్తాను చూడండి. నా కొలీగ్స్ తో కలిసి ఒకరోజు కాంటీన్లో లంచ్ చేస్తూ ఉండగా ఎందుకో బాయ్ ఫ్రెండుల టాపిక్ వచ్చింది రోజు. ఒక అమ్మాయి తన ప్రస్తుత బాయ్ ఫ్రెండుని ఎలా సెలెక్ట్ చేసుకుందో వివరించింది. అది విన్నాక నాకు దిమ్మ తిరిగిందంటే నమ్మండి. ఇంతకీ అమ్మాయి ఏం చేసిందంటే మొదట తనకి పరిచయం ఉన్న ఒక పది పదిహేనుమందిలోనుంచి.. మనిషి ఎలా ఉన్నాడు, కారైనా ఉందా లేదా.. మొదలైనవన్నీ స్క్రీనింగ్ చేసేసి చివరికి ఒక నలుగురిని సెమీ ఫైనల్ కి సెలెక్ట్ చేసిందట. ఒక రెండు-మూడు వారాలు వాళ్ళతో విడివిడిగా డేటింగులూ, డిస్కోలు, పబ్బులూ గట్రా విహరించేసి చివరిగా ఇద్దరిని ఫైనలైజ్ చేసిందట. అన్నీ రకాలుగా ఇద్దరి అబ్బాయిలకీ సమానంగా మార్కులు వచ్చాయట. ఇద్దరి మీద సమానంగా ఇష్టం అనిపించిందట. తీవ్రంగా ఆలోచించి ఒక మెరుపులాంటి ఆలోచన రాగా.. చటుక్కున డిసైడ్ చేసేసిందట. అది ఎలా అంటే.. అమ్మాయి తన పెంపుడు కుక్కని తీసుకుని విడి విడిగా ఇద్దరు అబ్బాయిలనీ కలిసిందంట. ఇద్దరిలో ఎవరి దగ్గర కుక్క కాస్త ఫ్రీగా మసలుతుందో.. ఎవరిని ఎక్కువ ఇష్టంగా ఫీల్ అవుతుందో .. అబ్బాయిని బాయ్ ఫ్రెండుగా సెలెక్ట్ చేసుకుందిట. ఐడియా బాగా వర్క్ అవుట్ అయింది. ఎంతైనా కుక్కలకి చాలా సెన్స్ ఉంటుంది తెలుసా..అని ముగించింది అమ్మాయి. ఇంకా మిగతా కొలీగ్స్ కూడా, వావ్.. వాటే సూపర్ ఐడియా.. అని మెచ్చుకున్నారు. అప్పుడు మీరు చూడాలి నా మొహం..తల తిరిగిపోయిందంటే నమ్మండి. బాయ్ ఫ్రెండుని ఇలా కూడా సెలెక్ట్ చేసుకోవచ్చా అని.blur


షాక్ లోంచి ముందు మీరు తేరుకోండి. మళ్ళీ మిగిలిన కబుర్లు తరవాత చెప్తాను.

Friday, April 10, 2009

పాటల సందడి - ఎవరో ఒకరు ఎపుడో అపుడు నడవరా ముందుకి అటో ఇటో.. ఎటో వైపు..!!

మనందరికీ ఎన్నెన్నో నచ్చిన పాటలు ఉంటాయి. కొన్ని పాటల్లో సంగీతం మదిని మెరిపిస్తే.. మరి కొన్ని పాటల్లో సాహిత్యం మురిపిస్తుంది.. మరి కొన్నీటిలో గాయకుల గాత్రం మైమరిపిస్తుంది. ఏదయితేనేం.. ఆయా పాటలు మాత్రం మన మనసుని ఆహ్లాదపరుస్తాయన్నది మాత్రం వాస్తవం. మన సినిమాల్లో అడపా దడపా మంచి మంచి పాటలు వచ్చి మనల్ని అలరిస్తూ ఉంటాయి. ఎన్నెన్నో వచ్చి వెళ్తుంటాయి కాబట్టి.. కాలగమనంలో కొన్ని మరచిపోతుంటాం. ఎక్కడో అనుకోకుండా పాట వినపడగానే.. పాటతో పాటుగా పాటలు ఇదివరకు విన్నప్పటి గత స్మృతులు.. దాన్ని అల్లుకున్న భావాలెన్నో మనని ముప్పిరిగొంటాయి. అలా అనుకోకుండా ఒక చక్కని పాట గుర్తొస్తే భలే సంతోషంగా అనిపిస్తుంది. ఉద్దేశ్యంతోనే.. నా బ్లాగులో అప్పుడప్పుడూ కొన్ని పాటల్ని గుర్తు చేస్తూ ఉంటాను.

కొన్ని అద్భుతమైన పాటలు ఒకోసారి ప్రజాదరణకు నోచుకోవు. సినిమా ఫ్లాప్ అవ్వడమో లేక మరింకేదో కారణాల వాళ్ళో పాటలు ఎక్కువ మంది దరి జేరవు. ఉదాహరణకి ఇప్పుడు నేను చెప్పే 'ఎవరో ఒకరు ఎపుడో అపుడు' అనే పాట 1992 లో వచ్చిన రేవతి నటించిన 'అంకురం' అనే సినిమాలోనిది. పాట తెలిసిన వారందరూ అద్భుతమనే అంటారు. కానీ.. తెలియని వారు కూడా చాలామందే ఉన్నారన్నది నిజం. విచిత్రం ఏంటంటే.. పాట పల్లవి తెలిసిన చాలామందికి పాట మొత్తం తెలీదు. మరి కొంతమందేమో పాట ఉందని తెలుసు గానీ పెద్దగా వినలేదు అంటారు. నిజమేనోయ్.. పాట చాలా బావుంటుంది. కానీ.. మధ్య విననే లేదు అనే వారు మరి కొందరు.


సరే లెండి.. తెలిసి ఉన్నా.. తెలీకపోయినా.. మనందరం గుర్తు చేసుకోదగ్గ అద్భుతమైన పాట ఇది. సంగీత దర్శకుడు 'హంసలేఖ' స్వరపరచిన పాటని చిత్ర, బాలు ఆలపించారు. ఎన్నెన్నో ఆణిముత్యాల్లాంటి పాటల్ని రాసిన సిరివెన్నెల గారి కలం నుంచి జాలువారింది పాట. మనిషిలో పట్టుదలను, స్ఫూర్తిని రగిలించేలా భావం ఉన్నా పాటలు ఎన్నో ఉన్నాయి మన తెలుగులో. కానీ.. పాటలో సిరివెన్నెల గారి ప్రయోగాలు ఎంతో అబ్బురపరుస్తాయి. తొలివేకువ కూత కూసే కోడిని, నిశీధిలో తిరుగాడే మిణుగురు పురుగులనూ, ఎండ వేడికి ఒళ్ళు మండి ఆవిరయ్యే సముద్రాన్ని.. ఇలా ప్రకృతిలో ఉన్న వాటన్నిటినీ చూసి మనం స్ఫూర్తిని పొందాలని సిరివెన్నెల గారు చెప్పిన మాటలు పాట విన్న వారి మదిలో ఎప్పటికీ నిలిచిపోతాయని నా అభిప్రాయం. అంతెందుకు అసలా పల్లవి చూడండి.. ఎవరన్నా ఏదైనా పనికి తొలి అడుగు వెయ్యాలా వద్దా అన్న సంశయంలో ఉంటే "ఎవరో ఒకరు ఎపుడో అపుడు నడవరా ముందుకు.. అటో ఇటో ఎటోవైపు.." వాక్యాలు వింటే.. ఖచ్చితంగా ముందడుగు వేసి తీరుతారు. ఏదైనా క్రొత్త బాటలో నడవాలన్న తలంపు వచ్చినవారికి రెండు మాటలు చెప్తే మది ఆత్మవిశ్వాసంతో నిండిపోతుంది. కాదంటారా.? "మొదటి వాడు ఎప్పుడూ ఒక్కడే మరి.. మొదటి అడుగు ఎప్పుడూ ఒంటరే మరి.. వెనుక వచ్చువాళ్ళకు బాట అయినది.."
సరే మరి.. నా వంతు అయిపొయింది. ఇంక ఇప్పుడు పాట సాహిత్యం చూసి, పాట విని అభిప్రాయం చెప్పే వంతు మీది :)

ఎవరో ఒకరు.. ఎపుడో అపుడు..
ఎవరో ఒకరు.. ఎపుడో అపుడు..
నడవరా ముందుగా.. అటో ఇటో ఎటో వైపు..
అటో ఇటో ఎటో వైపు..!

మొదటి వాడు ఎప్పుడూ ఒక్కడే మరి..
మొదటి అడుగు ఎప్పుడూ ఒంటరే మరి..
వెనుక వచ్చువాళ్ళకు బాట అయినది..!

ఎవరో ఒకరు.. ఎపుడో అపుడు..
నడవరా ముందుగా.. అటో ఇటో ఎటో వైపు..
అటో ఇటో ఎటో వైపు..!

కదలరు ఎవ్వరూ వేకువ వచ్చినా..
అనుకొని కోడి కూత నిదరపోదుగా ..
జగతికి మేలుకొలుపు మానుకోదుగా ..
మొదటి చినుకు సూటికా దూకి రానిదే..
మబ్బు కొంగు చాటుగా ఒదిగి దాగితే ..
వాన ధార రాదుగా నేల దారికి..
ప్రాణమంటూ లేదుగా బ్రతకటానికి ..

ఎవరో ఒకరు.. ఎపుడో అపుడు..
నడవరా ముందుగా.. అటో ఇటో ఎటో వైపు..
అటో ఇటో ఎటో వైపు..!

చెదరక పోదుగా చిక్కని చీకటి..
మిణుగురు రెక్క చాటు చిన్ని కాంతికి ..
దానికి లెక్క లేదు కాళరాతిరి..
పెదవి ప్రమిద నిలపనీ నవ్వు జ్యోతిని..
రెప్ప వెనక ఆపనీ కంటి నీటిని..
సాగలేక ఆగితే దారి తరుగునా..?
జాలి చూపి తీరమే దరికి చేరునా..?

ఎవరో ఒకరు.. ఎపుడో అపుడు..
నడవరా ముందుగా.. అటో ఇటో ఎటో వైపు..
అటో ఇటో ఎటో వైపు..!

యుగములు సాగినా నింగిని తాకక..
ఎగసిన అలల ఆశ అలసిపోదుగా..
ఓటమి ఒప్పుకుంటూ ఆగిపోదుగా..
ఎంత వేడి ఎండతో ఒళ్ళు మండితే..
అంత వాడి ఆవిరై వెళ్లి చేరదా..?
అంత గొప్ప సూర్యుడు కళ్లు మూయడా..?
నల్ల మబ్బు కమ్మితే చల్లబారడా..?

ఎవరో ఒకరు.. ఎపుడో అపుడు..
నడవరా ముందుగా.. అటో ఇటో ఎటో వైపు..
అటో ఇటో ఎటో వైపు..!