ఉగాది శుభాకాంక్షలు మరియు పంచాంగం

బ్లాగ్మిత్రులందరికీ 'వికృతి' నామ సంవత్సర ఉగాది శుభాకాంక్షలు.

పండుగ రోజు పంచాంగ పఠనం చేయాలి కదా మరి! ములుగు వారి తెలుగు పంచాంగం కోసం ఇక్కడ చూడండి.

మరుజన్మంటూ ఉంటే.!? - నా కోరికల జాబితా

-->

మరుజన్మంటూ ఉంటే.!? అసలు మరో జన్మ అనేది ఉందంటారా.? ఏమో.. ఉందీ, లేదూ అని ఇప్పటిదాకా ఎవరూ ఆధారాలతో నిరూపించలేదు కాబట్టి, అదెలాగూ సాధ్యమయ్యే పని కూడా కాదు కాబట్టి.. ఎంచక్కా మనిష్టానుసారం ఉందనో లేదనో అనేసుకోవచ్చు. లేదనుకుంటే ఒక్క మాటతో తేలిపోతుంది. అదే ఉందనుకుంటే, ఎంచక్కా బోలెడు ఊహించుకోవచ్చు. వచ్చే జన్మలో ఎలా పుడితే బాగుంటుంది, ఏం చేస్తే బాగుంటుందో ఎంచక్కా ప్లానింగూ గట్రా చేస్కోవచ్చు. మీరేమంటున్నారో నాకు వినపడిందిలెండి. అక్కడికి యీ జన్మలో ఏదో బాగా ప్లాను చేసుకుని దాని ప్రకారమే నడుస్తున్నట్టూ.. అనేగా? మరేం చేసేది చెప్పండి.. ఎంచక్కా ఊహల్లో విహరించడం, ప్రణాళికలు రచించడం వరకూ ఉండే ఉత్సాహమంతా ఆచరణలో పెట్టాల్సివచ్చినప్పుడు ఉండకపోవడమనేది కుంచెం బద్ధకం ఉన్నవాళ్ళకి సహజమే కదా.!? కాబట్టి మీరలాంటి సందేహాలేమీ పెట్టుకోకూడదన్నమాట. సరే! విషయం పక్కదోవ పడుతున్నట్టుంది. ఇహ అసలు విషయానికొచ్చేసి అర్జెంటుగా వచ్చే జన్మ కోసం నాకున్న కోరికల చిట్టా పద్దేంటో మీకు చదివి వినిపించేస్తా. సావధానంగా వినెయ్యండి మరి!

1. ముందుగా, వచ్చే జన్మలో కూడా తెలుగింటమ్మాయిగానే పుట్టాలి. మరీ ముఖ్యంగా తెలుగు రాయడం, చదవడం ఖచ్చితంగా వచ్చి ఉండాలి.

2. మా నాన్నకే మళ్ళీ ఏకైక ముద్దుల కూతురిగానే పుట్టాలి. ఏకైక అని ఎందుకన్నానంటే పోటీ ఎవరూ ఉండకూడదు మరి! మా అమ్మ కడుపునే పుట్టాలి. కాకపోతే, నాదెప్పుడూ ముందు నాన్న మాటే తరవాతనే అమ్మ మాట. చిన్నప్పుడు ఏదన్నా దెబ్బ తగిలితే అందరు పిల్లలూ అమ్మా అని ఏడిస్తే, నేను మాత్రం నాన్నా అని ఏడ్చేదాన్నంట! అంతటి ఘన చరిత్ర ఉంది మరి నా వెనకాల. అందుకే అలా చెప్పానన్న మాట.! అసలు ఒకోసారి నాకింకోలాగా కూడా అనిపిస్తుంటుంది. యీ జన్మలో అమ్మా, నాన్న నాకోసం ఎన్నెన్ని కష్టాలూ, ఇబ్బందులూ పడి ఇంత ప్రేమగా పెంచారు కదా.. కాబట్టి, వెరైటీగా వచ్చే జన్మలో నా కడుపునే వాళ్ళు పుడితే బాగుంటుందేమో అని. అప్పుడు మా నాన్నకి ఎంతో ఇష్టమైన డాక్టరు చదివిస్తాను. ఎలా ఉందంటారూ నా ఆలోచన?

అలాగే, తప్పకుండా మా తమ్ముడు కూడా నాతోనే పుట్టాలి. వాడు లేకపోతే జీవితం మహా చప్పగా ఉంటుంది. ఇందులో ఒక స్వార్ధం కూడా ఉంది. తమ్ముడిగానే అయితే ఎంచక్కా వచ్చే జన్మలో కూడా వాడి మీద 'అక్క జులుం' చేయచ్చు.. టీవీ రిమోట్ దగ్గర నుంచీ.. తినే చిరుతిండి దాకా వంతుల కోసం బాగా పోట్లాడుకోవచ్చు. హీ హీ హీ
ఏంటీ.. ఇంకా ఎవరు కావాలీ.. అంటారా? మరీ, అలా రగస్యాలన్నీ చెప్పెయ్యమంటే ఎలాగండీ.!? అర్ధం చేసుకోరూ!!

3. ఇంకా...వచ్చే జన్మలో కూడా ఎంచక్కా సైన్సే చదుకోవాలి. అప్పుడు కూడా పీహెచ్డీ చేసెయ్యాలని అనుకోనా.? పీహెచ్డీ చేసేవాళ్ళేవరైనా ఇది చూస్తే మాత్రం రామేశ్వరం వెళ్ళినా శనీశ్వరం వదలనట్టు.. వచ్చే జన్మలో కూడా పీహెచ్డీ ఏనా.. అని తిట్టుకుంటారేమో నన్ను.

మా బాగా చెప్తున్నావులేమ్మా... యీ మాత్రం దానికి అన్నీ యీ జన్మలోవే డిటో డిటో అని చెప్పెయచ్చుగా..ఇంత కరశోష (చేత్తో రాస్తున్నా కదా మరి!) ఎందుకు? అని అంటున్నారు కదూ.? ఇది కూడా వినిపించింది నాకు. సరే, ఇప్పుడు యీ జన్మలో చేయలేకుండా పోయినవి, చేయాలనుకునేవి చెప్తా ఇప్పుడు.

4. వచ్చే జన్మలో నా చిన్నప్పుడు బోలెడన్ని చందమామలు (పుస్తకాలు) ఉండాలి నాకోసం. చిన్నప్పటి నుంచి నాకెంతో ఇష్టమైన భరతనాట్యమో, కూచిపూడినో నేర్చుకోవాలి. సుమధుర గాత్రం కూడా ఉండి సంగీతం కూడా నేర్చుకుంటే ఇంకా బాగుంటుంది. మరీ అత్యాశ కదూ!?

5. నా చిన్నప్పుడు మా నాన్నకి చాక్లెట్ ఫ్యాక్టరీ, బిస్కెట్ ఫ్యాక్టరీ, పాప్ కార్న్ ఫ్యాక్టరీ, ఇంకా హార్లిక్స్ ఫ్యాక్టరీ ఉండాలి. నేను పెద్దయ్యాకేమో అవన్నీ మారిపోయి బట్టల ఫ్యాక్టరీలు, నగల ఫ్యాక్టరీలు లాంటివి ఉండాలన్నమాట!

6. ఇంకా.. నాకిష్టమైన ఘంటసాల, విశ్వనాథ్, మణిరత్నం, సచిన్, ఇళయరాజా, రెహ్మాన్ లాంటివాళ్ళు కూడా అప్పుడు పుట్టాలి. వీళ్ళందరూ లేకపోతే ఇంకేమన్నా ఉందా.? బోలెడు ఆనందం మిస్సయిపోతాను బాబూ..! అసలు ఇప్పుడే నాకింకో దురాలోచన వచ్చింది. వీళ్ళందరూ కూడా మా నాన్నకి స్నేహితులయ్యుంటే ఇంకా బాగుంటుంది కదూ!

7. నాకింకో దురాలోచన కూడా ఉంది. అదేంటంటే, ఎంత నెయ్యి తిన్నా కూడా బొజ్జ పెంచెయ్యకుండా ఏ వయసులోనైనా ఎంచక్కా సన్నగానే ఉండాలి ఎప్పుడూ. అది కూడా ఎక్సర్సైజులూ గట్రా చేయకుండానే!

8. మరేమో.. ఇంకా నాకు నల్లటి పట్టు కుచ్చులాంటి పేద్ద.. జడ ఉండాలి. జుట్టు ఊడిపోతూ జడ సన్నగా అయిపోకుండా ఎప్పుడూ అలానే ఉండాలి అందంగా!

9. ఇలా ఇవన్నీ కూడా పోయిన జన్మలోనే ప్రోగ్రాం చేసుకున్నవి అని మాత్రం ముందే తెలిసిపోకూడదు. అలా ముందే తెలిసిపోతే ఎక్సైట్మెంటు మిస్సవుతుంది కదా మరి!

అసలైతే ఇంకా పెద్ద జాబితానే ఉండాలి. ఏంటో! సమయానికి గుర్తు రావు కదా!ప్చ్.. ఏం చేస్తాం.. ఇవ్వాళ మీ టైం బాగున్నట్టుంది. ఇహ ఇక్కడితో ఆపేస్తాన్లెండి నా వచ్చే జన్మ విష్ లిస్టు.

అసలు నాకో ఆలోచనొస్తోంది. ఎంచక్కా దేవుడికి ఒక పోస్ట్ బాక్స్ ఉంటే బాగుంటుంది కదా! మనం ఏది కావాలంటే అది రాసేసి ఆ డబ్బాలో పడేస్తే సరి.! క్రిస్మస్ తాత గిఫ్టులు తెచ్చినట్టు, మన కోరికల జాబితాని దేవుడు చూసేసి.. తథాస్తు.. అనేస్తే ఓ పని అయిపోతుంది. దేవుడనేది ఓ నమ్మకం..అదీ ఇదీ అని జ్ఞానబోధలు గుర్తు చేసుకోకూడదు ఇలాంటి సమయంలో. ఇలాంటి అందమైన ఊహలన్నీ మిస్సయిపోతాం అలా అయితే! అప్పుడప్పుడూ ఇలాంటి ఊహల్లో విహరిస్తుంటే బాగుంటుంది కదూ!

గోదావరి ఒడ్డున..

గోదావరి ఒడ్డున సాయంసంధ్యాసమయంలో నించున్నాను.

పడమటన బంగారుబంతిలా మెరుస్తున్న సూరీడు మెలమెల్లగా గౌతమి ఒడిలో మమేకమైపోతున్నట్టుంది.

చల్లని గాలి తెమ్మెరల గిలిగింతలకి నీటి అలలు వయ్యారంగా కదులుతున్నాయి.
వాటిపైన పడి మెరుస్తున్న సూర్యకిరణాలను చూస్తుంటే నక్షత్రాలు దిగొచ్చి గోదావరి అలలపైన తేలియాడుతున్నాయా అన్నట్టుంది.

దూరంగా కనిపిస్తున్న చిన్న చిన్న చెక్క పడవలు క్రమంగా నా కంటికి చేరువౌతున్నాయి.
నీలాకాశంలో గూడు చేరే తొందరలో ఉన్న పక్షులు అలుపనుకోకుండా తమ పయనాన్ని సాగిస్తున్నాయి.
దూరంగా వంతెనపైన పరుగులు తీస్తున్న వాహనాలు చీమల బారుల్ని తలపిస్తున్నాయి.

తూర్పున శ్రీరామచంద్రుడి ఆలయ గాలిగోపురం ఠీవీగా నిలబడి చూస్తోంది.
రామాలయానికి దారితీస్తున్న మెట్లు మిమ్మల్ని స్వామి చరణాల వద్దకు చేరుస్తాను రమ్మని పిలుస్తున్నట్టుగా ఉంది.