జర్మనీలోని మా ఊరి కబుర్లు ఇవాళ్టి ఆంధ్రజ్యోతిలో..

ఇక్కడ జర్మనీలోని మా ఊరి గురించి నేను చెప్పిన కబుర్లని అందమైన వ్యాసంగా తీర్చిదిద్ది ఇవాళ్టి ఆంధ్రజ్యోతిలో 'నవ్య' విభాగంలో ప్రచురించారు అరుణ పప్పు గారు. నా బ్లాగ్ముఖంగా అరుణ పప్పు గారికి మరోసారి ధన్యవాదాలు తెలుపుకుంటున్నాను. మా ఊరి కబుర్లు మీరూ ఓసారి చదివెయ్యండి మరి..

ఎక్కువమంది కోరుకునే ఉద్యోగం ఏది?

ప్రతీ మనిషికీ బ్రతుకు తెరువు కోసం ఏదో ఒక పని చేయక తప్పదు. బ్రతుకు తెరువు కోసం వెతుక్కునే అవసరం లేని అతి కొద్ది మంది ధనవంతులకి కూడా ఊసుపోడానికైనా ఏదో ఒక ఉద్యోగం చేసి తీరాలి. ఇంత పెద్ద ప్రపంచంలో మనం చేయాలనుకోవాలే గానీ ఎన్ని రకాల ఉద్యోగాలో ఉన్నాయి. అయితే ఆసక్తికరమైన విషయమేంటంటే, 'పుర్రెకో బుద్ధి జిహ్వకో రుచి' అన్నట్టు ఒక్కొక్కరిది ఒక్కో ఆసక్తి. ఆసక్తి ప్రకారం ఉద్యోగాన్ని ఎంచుకునే వారు కొందరైతే, మన చుట్టూ ఉన్న సమాజాన్ని అనుసరించి లాభనష్టాలు బేరీజు వేసుకుని, ధనం, కీర్తి పరంగా ఏది ఎక్కువ లాభాదాయకమో బాగా లేక్కలేసుకుని ఆ ఉద్యోగం చేయడం. మన దేశంలో, మరీ ముఖ్యంగా మన రాష్ట్రంలో రెండో రకానికి చెందినవారే ఎక్కువ మంది ఉంటారని నా అభిప్రాయం ;-)

సరే, ఏ విధంగానైనా సరే ఎక్కువమంది ప్రజలు మొగ్గు చూపే ఉద్యోగాలు ఏవి? ఏ పని చేయడానికి, లేదా ఏ హోదాలో ఉండటానికి జనాలు మక్కువ చూపిస్తున్నారు? అనే విషయాలు చాలా ఆసక్తికరంగా ఉంటాయి. ఇలాంటి సర్వేలు ప్రతీ దేశంలో, ప్రతీ రాష్ట్రంలో చేస్తే ఒక్కోచోట ఒక్కో రకమైన జాబితా తయారవుతుంది కాబోలు! ఆ జాబితాని బట్టి ఆయా దేశాల్లో ప్రజల ఆలోచనా విధానం, మనోభావాలు, అక్కడి సామాజిక పరిస్థితులు తదితర విషయాల గురించి ఒక అవగాహనకొచ్చే వీలుంటుంది కదా!

ఇలాంటి ఒక సర్వేని జర్మనీ లో నిర్వహించారట. కాకపోతే, వాళ్ళు సర్వే చేసిందేమిటంటే, అత్యధిక శాతం మంది ఇష్టపడని ఉద్యోగాలు ఏంటీ అని! జర్మనీ వాళ్ళు చేయడానికి ఇష్టపడని టాప్ టెన్ ఉద్యోగాల జాబితా ఇలా ఉంది.

1. ఇన్సూరెన్స్ ఏజెంట్
2. రాజకీయ నాయకుడు
3. సుదూరాలు డ్రైవ్ చేసే ట్రక్ డ్రైవర్లు (మన లారీ డ్రైవర్ల లాగా)
4. రోడ్ స్వీపర్ (రోడ్లో చెత్త ఊడ్చే పని)
5. రైతు, వ్యవసాయదారుడు
6. ఎలిమెంటరీ స్కూల్ టీచర్
7. దాసీ పని (హౌసు-కీపింగ్, ఇంట్లోనో, ఆఫీసులోనో ఒకరి చేతి కింద ఉండి క్లీనింగు పనులు వగైరా చూడటం)
8. బ్యాంకు ఉద్యోగి
9. డాక్టర్
10. జర్నలిస్టు

జర్మనీ లో రోడ్లు ఊడ్చే పనికి కూడా మిగతా వాటిలాగా బాగానే డబ్బులొస్తాయి కాబట్టి, ఇక్కడ జనాలు కేవలం తమ ఆసక్తి తగ్గట్టే ఉద్యోగాలు చేస్తుంటారు కానీ పైన చెప్పినట్టు మనలాగా రెండో రకానికి చెందిన వాళ్ళు కొంత తక్కువ అని నా ఉద్దేశ్యం. ఏదేమైనా జర్మన్ల లిస్టులో "డాక్టరు, బాంకు ఉద్యోగం, ఎలిమెంటరీ టీచరు, రాజకీయ నాయకుడు" ఉండటం నాకు ఆశ్చర్యాన్ని కలిగించింది. మనకైతే అవన్నీ కూడా మాంచి డిమాండున్న ఉద్యోగాలు కదా మరి! మన దేశంలో డాక్టరైతే ఎంచక్కా పది చేతులా డబ్బు సంపాదించచ్చు. కానీ, ఇక్కడ పాపం అలా అడ్డ దిడ్డంగా దోచుకునే అవకాశం ఉండదు డాక్టర్లకి. పైగా డాక్టరు చదువూ, వృత్తీ కూడా బోలెడు కష్టం, శ్రమతో కూడుకున్నవి. అందుకే వీళ్ళు దానికి 'నో' చెప్పారని అనిపిస్తోంది. ఇకపోతే రాజకీయ నాయకుల విషయంలో కూడా దాదాపు ఇదే వర్తిస్తుంది. అదీ కాక, మన దేశంలో రాజకీయ నాయకులవ్వాలంటే 99% మన పుట్టుకతోనే జరిగిపోవాలి కదా మరి ;-) ఇహ మిగతా బ్యాంకు ఉద్యోగాలూ, టీచరు ఉద్యోగాలూ.. వీటిల్లో కూడా సర్కారు వారి ఉద్యోగాలకైతే మన దేశంలో ఎంత డిమాండో చెప్పక్కర్లేదుగా. మనలో మన మాట.. మన రాష్ట్రంలో చాలా మంది అబ్బాయిలు ఎంచక్కా బోలెడు కట్నం వస్తుంది, పైగా సర్కారీ కొలువుల్లో పెద్దగా పని చేసే అవసరం లేకుండానే నడిచిపోతుందని.. వీటికే మొదటి వోటు వేస్తారు కదూ! ;-) ఇహ పైన జాబితాలో మిగతా వాటి సంగతి చూస్తే, తక్కిన వాటితో పోలిస్తే అవి కాస్త శ్రమ ఎక్కువ ఉండే ఉద్యోగాలు గనక 'నో' చెప్పారని అనిపిస్తోంది.

సరే, జర్మనీ సంగతెలా ఉన్నా... పై జాబితా వివరాలు చూడగానే మన రాష్ట్రంలో, దేశంలో యీ సర్వే చేస్తే ఆ జాబితా ఎలా ఉంటుందా అనే ఆలోచన వచ్చింది నాకు. ఇష్టపడనివీ, ఇష్టపడేవీ రెండు రకాల సర్వేలు చేస్తే ఎలా ఉంటుదంటారూ?

ప్రస్తుత పరిస్థితుల్లో మన రాష్ట్రంలో జనాల అభిప్రాయం ఎలా ఉండచ్చో నేనూహించి ఓ లిస్టు రాస్తున్నా. మీరు కూడా తలా ఓ చెయ్యి వెయ్యండి ;-)

ఇష్టపడే ఉద్యోగాలు:

1. అమెరికా ఉద్యోగం ;-)
2. సాఫ్ట్ వేర్ ఇంజనీరు
3. గవర్నమెంటు ఉద్యోగం (టీచరు, బ్యాంకరు, ఏదైనా సరే!)
4. డాక్టరు
5. ఇంజనీరు
6. రియల్ ఎస్టేటు
7. రాజకీయం (ఏ రాజకీయ నాయకుడి ఇంట్లోనో పుడితేనో, లేకపోతే దూరే సందు దొరికితేనో ;-)
8, 9, ..............


ఇష్టపడని ఉద్యోగాలు:

1. వ్యవసాయం
2. పల్లెటూర్లో పని చేయాల్సొచ్చే ఉద్యోగాలు
3, 4, 5...

ప్చ్... సమయానికేమీ తట్టట్లేదు... ఇహ మీరందుకోండి ఇక్కడ నుంచి ;-)

కొన్ని జర్మనీ బొమ్మలు

ఈసారికి ఇక్కడికెళ్ళి చూసి రండి ;-)

జర్మన్ బాయ్ ఫ్రెండ్-గర్ల్ ఫ్రెండ్ కబుర్లు

జర్మనీలో చాలా రోజులనుంచి ఉంటున్నాను కాబట్టి, నేను చూసిన కొన్ని బాయ్ ఫ్రెండ్-గర్ల్ ఫ్రెండ్ కబుర్లు చెప్తాను. ముందుగా.. నేను ప్రత్యక్షంగా చూసిన కొన్ని విచిత్ర బంధాలు (మీకు కూడా అలానే అనిపిస్తాయి చూడండి) ఒక్కోటి చెప్తాను. తరవాత చివరగా నా విశ్లేషణ (అంటే నా అభిప్రాయం) చెప్పి ముగిస్తాను.

ఒకరోజు మా అపార్ట్మెంట్ ముందు నిలబడి మాట్లాడుతున్నాము నేనూ, మరో ఇద్దరు స్నేహితులు. ఎండాకాలం కాబట్టి కాస్త అలా బయట తీరిగ్గా నుంచుని మాట్లాడుతున్నాము. అప్పుడే ఒక జర్మన్ అబ్బాయి, అమ్మాయి (అదేనండి ప్రస్తుత కథలో వాళ్ళే వీరో-వీరోయినునూ..) బయటకొస్తున్నారు ఎదురింట్లోనుంచి. అమ్మాయి చేతిలో ఒక పెద్ద కుక్క కూడా ఉంది. వాళ్ళెక్కడికో బయలుదేరే ప్రయత్నంలో ఉన్నట్టు అనిపించింది. ఈలోపు ఆ అబ్బాయి 'డార్లింగ్.. మనం హాయిగా బయటికి షికారెళ్దాం అనుకున్నాం కదా.. మధ్యలో కుక్క ఎందుకు' అన్నాడు. వాళ్ల పరిస్థితి చూస్తుంటే ఆ కుక్క సదరు గర్ల్ ఫ్రెండ్ గారాల పట్టి అనీ, ఇతగాడికేమో ఆ కుక్క మీద పెద్దగా ఆసక్తి లేదనీ అనిపించింది. ఆ అమ్మాయేమో కావాలంటే నీతో రావడం మానేస్తాను గానీ, నా బుజ్జి కుక్కని మాత్రం వదిలి వచ్చే ప్రసక్తే లేదు అంది. దానికి ఆ అబ్బాయి 'నాకంటే ఈ తొక్కలో కుక్కే నీకు ఎక్కువా' అన్నాడు. అంతే.. అయిపోయింది. ఇంక చూస్కోండీ.. ఆ అమ్మాయి ఒక రేంజ్ లో వేస్కుంది ఆ అబ్బాయిని. నువ్వెంత నీ బతుకెంత.. నిన్న గాక మొన్నొచ్చావు, మహా అంటే.. ఇంకో రెన్నెళ్ళు ఉంటావు. నువ్వు కాకపోతే ఇంకో గొట్టం గోపాల కృష్ణ.. అంతే గానీ.. నా కుక్కని (ఆ అమ్మాయి కుక్క అనలేదు దాని పేరేదో ఉంటుందిగా టామీనో, రామీనో..) నాతో తీసుకురావద్దంటావా.. అంతే కాక తొక్కలో కుక్క అంటావా.. బ్రేక్ అప్.. అంది. అబ్బాయేమో.. అయితే ఏంటి, ఈ తొక్కలో కుక్కతో పాటు ఉన్న నువ్వు కాకపోతే ఇంక అమ్మాయిలే కరువా ఏంటి.. నేను కూడా బ్రేక్ అప్.. అన్నాడు. అంతే.. సింపుల్ గా పదే పది నిమిషాల్లో వాళ్ల విచిత్ర బంధానికి (బంధం అనడం కూడా అనవసరమేమో..) 'ది ఎండ్' పడింది. ఇలాంటి సందర్భాల్లో ఇంకో చిత్రమైన మలుపేంటంటే.. ఒక రెండు మూడు రోజులయ్యాక, ఇద్దరూ మళ్ళీ మాట్లాడుకుంటారు. మొన్న అలా జరిగింది కదా, ఏమైనా మనిద్దరి అభిరుచులు కలవకపోవడం వల్లే అలా జరిగింది. లైట్ తీస్కుందాం.. 'లెట్స్ బి ఫ్రెండ్స్' అనుకుంటారు. నేనివాళ డిస్కోకి వెళ్తున్నాను కొత్త బాయ్ ఫ్రెండుని వెతుక్కోవడానికి, నువ్వూ రారాదూ..అంటుంది అమ్మాయి. మరి అక్కడ నుంచి మరో ప్రహసనం మొదలు.

మరో సంఘటన చెప్తాను చూడండి. నా కొలీగ్స్ తో కలిసి ఒకరోజు కాంటీన్లో లంచ్ చేస్తూ ఉండగా ఎందుకో బాయ్ ఫ్రెండుల టాపిక్ వచ్చింది ఆ రోజు. ఒక అమ్మాయి తన ప్రస్తుత బాయ్ ఫ్రెండుని ఎలా సెలెక్ట్ చేసుకుందో వివరించింది. అది విన్నాక నాకు దిమ్మ తిరిగిందంటే నమ్మండి. ఇంతకీ ఆ అమ్మాయి ఏం చేసిందంటే మొదట తనకి పరిచయం ఉన్న ఒక పది పదిహేనుమందిలోనుంచి.. మనిషి ఎలా ఉన్నాడు, కారైనా ఉందా లేదా.. మొదలైనవన్నీ స్క్రీనింగ్ చేసేసి చివరికి ఒక నలుగురిని సెమీ ఫైనల్ కి సెలెక్ట్ చేసిందట. ఒక రెండు-మూడు వారాలు వాళ్ళతో విడివిడిగా డేటింగులూ, డిస్కోలు, పబ్బులూ గట్రా విహరించేసి చివరిగా ఇద్దరిని ఫైనలైజ్ చేసిందట. అన్నీ రకాలుగా ఆ ఇద్దరి అబ్బాయిలకీ సమానంగా మార్కులు వచ్చాయట. ఇద్దరి మీద సమానంగా ఇష్టం అనిపించిందట. తీవ్రంగా ఆలోచించి ఒక మెరుపులాంటి ఆలోచన రాగా.. చటుక్కున డిసైడ్ చేసేసిందట. అది ఎలా అంటే.. ఆ అమ్మాయి తన పెంపుడు కుక్కని తీసుకుని విడి విడిగా ఇద్దరు అబ్బాయిలనీ కలిసిందంట. ఇద్దరిలో ఎవరి దగ్గర కుక్క కాస్త ఫ్రీగా మసలుతుందో.. ఎవరిని ఎక్కువ ఇష్టంగా ఫీల్ అవుతుందో .. ఆ అబ్బాయిని బాయ్ ఫ్రెండుగా సెలెక్ట్ చేసుకుందిట. ఈ ఐడియా బాగా వర్క్ అవుట్ అయింది. ఎంతైనా కుక్కలకి చాలా సెన్స్ ఉంటుంది తెలుసా..అని ముగించింది ఆ అమ్మాయి. ఇంకా మిగతా కొలీగ్స్ కూడా, వావ్.. వాటే సూపర్ ఐడియా.. అని మెచ్చుకున్నారు. అప్పుడు మీరు చూడాలి నా మొహం..తల తిరిగిపోయిందంటే నమ్మండి. బాయ్ ఫ్రెండుని ఇలా కూడా సెలెక్ట్ చేసుకోవచ్చా అని.

ఈ షాక్ లోంచి ముందు మీరు తేరుకోండి. మళ్ళీ మిగిలిన కబుర్లు తరవాత చెప్తాను.