ఏ నావదే తీరమో.. ఏ నేస్తమే జన్మ వరమో!

నాకు సంకీర్తన అనే పేరు చాలా ఇష్టం. అందుకని కొన్ని నెలల క్రితం 'సంకీర్తన' సినిమా చూసాను. 1987 లో వచ్చిన ఈ సినిమాలో నాగార్జున, రమ్యకృష్ణ, గిరీష్ కర్నాడ్ తదితరులు నటించగా గీతాకృష్ణ కథ, దర్శకత్వం వహించారు ఈ సినిమాకి. సంభాషణలు తనికెళ్ళ భరణి గారు వ్రాశారు. ఈ సినిమాకి ప్రాణం ఇళయరాజా సంగీతం అనుకోవచ్చేమో!

ఈ సినిమాలో పాటలు నేను ఇదివరకు ఎక్కువ విని ఉండకపోయినా బాగుంటాయన్నట్టు నాకు గుర్తు. అదెలాగంటే, ఒకసారి చిన్నప్పుడు అంటే స్కూల్లో చదువుకునే రోజుల్లో మా ఇంట్లో స్వర్ణకమలం, సంకీర్తన సినిమా పాటల కేసెట్ ఉంటే, నేనూ మా తమ్ముడూ కల్సి ఇవేవో డొక్కు పాటలనుకుంటా అని ఫిక్స్ అయిపోయి అందులో ప్రేమికుడు, జీన్స్ సినిమా పాటలు రికార్డ్ చేసాం.. అప్పటి నుంచీ మా నాన్న ఒకసారి అక్షింతలు వేసి ఊరుకోకుండా గుర్తొచ్చినప్పుడల్లా మళ్ళీ మళ్ళీ తిట్టేవారు.. అంత మంచి పాటలు పాడు చేసారా అని.. అలాగే 'కిషోర్ కీ యాదే' నో ఏదో పేరున్న హిందీ కేసెట్ ని కూడా అలాగే చేసాం అనుకోండి అది వేరే కథ!

అయితే, మొన్నా మధ్య ఈ సంకీర్తన సినిమా చూసానన్నాను కదా! గొప్ప సినిమా అని చెప్పను గానీ, బానే ఉంటుంది సినిమా. రమ్యకృష్ణ మాత్రం చాలా నచ్చేసింది నాకీ సినిమాలో.. తనకి ఎక్కువ డైలాగ్స్ ఉండవు.. మోహంలో భావాలు పలికిస్తూ కళ్ళతోనే మాట్లాడేస్తుంది చాలా సార్లు.

మళ్ళీ పాటల విషయానికొస్తే సినిమా చూసేప్పుడు ఒకసారి విన్నాక మళ్ళీ వాటి సంగతే మర్చిపోయాను. నిన్నెందుకో ఈ సినిమా పాటలు విన్నా చిమట మ్యూజిక్ లో. అన్నీ పాటలు బావున్నాయి గానీ నేను మాత్రం 'ఏ నావదే తీరమో..' అనే పాట దగ్గర ఆగిపోయా! ఎంతలా ఆగిపోయానంటే.. అంటే నిన్నటి నుంచీ ఇప్పటి దాకా ఈ ఒక్క పాటే వినేస్తూ ఊ ఊ.. వినేస్తూనే ఉన్నా!

మనుషుల మనసుల్ని చదివేసినట్టు పాటలు రాసే మనసు కవి ఆత్రేయ గారి సాహిత్యం, KJ ఏసుదాస్ గారి మార్దవం నిండిన గొంతులో పలికిన భావం, ఇళయరాజా గారు కూర్చిన మృదుమధురమైన సంగీతం... అబ్బబ్బా... వింటూ ఉన్న కొద్దీ మనసు లోతుల్లో ఎక్కడో ఏదో కదిలిపోతున్నట్టు ఒక చిత్రమైన భావన.. ప్రేమ, బెంగ, దిగులు, ఎడబాటు, వేదాంతం.. ఇలా ఎన్నో రకరకాల భావాలు కలిసిపోయి మాటల్లో చెప్పలేని ఒక వింత అనుభూతి కలుగుతోంది. కానీ, ఎన్నిసార్లు విన్నా ఇంక చాల్లే అని మాత్రం అనిపించట్లేదు.. నేను ఇంకొన్ని రోజుల దాకా ఈ ఒక్క పాటలోనే బతికేస్తానేమో!

నీకూ.. నాకే.. చెల్లిందనూ..! నీవూ.. నేనే.. సాక్ష్యాలనూ..! కలగానో.. కథగానో.. మిగిలేది నీవే.. ఈ జన్మలో! పాటలో ఈ వాక్యాలు అయితే ఎన్ని వందల సార్లు విన్నా తనివి తీరనంత నచ్చేసాయి.. Haunting అంటారే.. అలా ఈ పాట నన్ను వెంటాడుతున్నట్టుంది నా చెవుల్లో నిలిచిపోయి..

ఏ నావదే తీరమో..
ఏ నేస్తమే జన్మ వరమో!
కలగానో.. కథగానో..
మిగిలేది నీవే.. ఈ జన్మలో!

నాలోని నీవే నేనైనాను..
నీలోని నేనే నీవైనావు..
విన్నావా ఈ వింతను..
అన్నారా ఎవరైననూ..
నీకూ.. నాకే.. చెల్లిందనూ..!

ఆకాశమల్లే నీవున్నావు..
నీ నీలి రంగై నేనున్నాను..
కలిసేది ఊహేననూ..
ఊహల్లో కలిశామనూ..
నీవూ.. నేనే.. సాక్ష్యాలనూ..!

పాట వినాలనుకుంటే ఇక్కడ చూడండి.

వీడియో కోసం ఇక్కడ చూడండి.

వెన్నెల్లో నడిచే మబ్బుల్లాగా.. వర్షంలో తడిసే సంద్రంలాగా..

పైన పేరు చూశారుగా.. అసలు ఆ వాక్యాలు వింటే ఏమనిపిస్తుంది??
"వెన్నెల్లో నడిచే మబ్బుల్లాగా.. వర్షంలో తడిసే సంద్రంలాగా.."
ఆహా.. నాకయితే నిజంగానే వెన్నెల్లో నడిచే మబ్బుల్లో నేను విహరిస్తున్నట్టుగా ఉంటుంది ఈ పాట వింటుంటే :)

సున్నితమైన భావాలని అంత అందంగా వ్యక్తపరచగలగడం నిజంగానే మహానుభావులకు మాత్రమే సాధ్యం అనిపిస్తుంది నాకయితే..! సంగీతం కూడా హాయిగా మనసును మీటుతున్నట్టుగా ఉంటుంది. నాకు చాలా చాలా నచ్చే పాటల్లో ఇదొకటి. అందుకే ఈ వేళ మీకు కూడా ఓ సారి ఈ పాటను గుర్తు చేద్దామనిపించింది.


ఇంతకీ గుర్తొచ్చేసిందా ఈ పాట ఏంటో.. ఈ పాట 'క్రియేటివ్ డైరెక్టర్' కృష్ణవంశీ దర్శకత్వంలో 1999 లో వచ్చిన 'అంతఃపురం' అనే సినిమాలోది. ఈ సినిమాలో ప్రకాష్ రాజ్, సౌందర్య, సాయి కుమార్, జగపతి బాబు మొదలైన వారు నటించారు. ఈ సినిమాలో నటించిన ప్రతీ ఒక్కరూ కెరీర్ లో మైలురాయిలా నిలిచిపోయే పాత్రలు పోషించారు. నంది అవార్డులు, ఫిల్మ్ ఫేర్ అవార్డులతో పాటు చాలా మంచి పేరు వచ్చింది ఈ సినిమాకి.

ఏ లోకానుందోగానీ.. మహానటి సౌందర్య ఈ సినిమాలో తన నట విశ్వరూపాన్ని ప్రదర్శించి అందరినీ అబ్బురపరిచింది. అలాంటి గొప్ప నటిని కోల్పోవడం మనందరి దురదృష్టం :( సినిమాలో విదేశాల్లో ఉండే సౌందర్య, సాయి కుమార్ ప్రేమించుకుని పెళ్లి చేసుకోవడం, ఆనందంగా జీవితం గడుస్తూ ఉండే సన్నివేశాల్ని ఈ పాట రూపంలో చిత్రీకరించారు దర్శకులు. పాటల్ని చిత్రీకరించడంలో అందెవేసిన చెయ్యి కదా మన కృష్ణ వంశీది. ఈ పాటని చాలా ముచ్చటగా తీర్చిదిద్దాడు.


సంగీతం 'మ్యూజిక్ మేస్ట్రో' ఇళయరాజా గారు అందించారు. ఈ పాట వింటుంటే మనకి KV మహదేవన్ గారి సంగీతం విన్నట్టుగా కూడా అనిపిస్తుంది. ఆ శైలి, పాటలోని మాధుర్యం అలా అనిపిస్తాయన్నమాట. చిత్ర గాత్రం ఈ పాటని మరింత వినసొంపుగా మార్చింది.

ఈ పాటకి ప్రాణం మాత్రం సిరివెన్నెల సీతారామ శాస్త్రి గారి సాహిత్యం అని నేనంటాను. ఒక అమ్మాయి జీవితం ఆనందంగా సాగిపోతూ ఉన్నప్పుడు తన భావాలెలా ఉంటాయో సిరివెన్నెల గారు చెప్పినట్టుగా మరెవ్వరూ చెప్పలేరేమో.. అన్నట్టుగా ఉంటుంది ఈ పాట. ప్రతీ వాక్యం సూటిగా మనసుని తాకుతుంది.


కల్యాణం కానుంది కన్నె జానకికీ..
వైభోగం రానుంది రామచంద్రుడికీ..
దేవతలే దిగి రావాలి.. జరిగే వేడుకకీ..
రావమ్మా సీతమ్మా.. సిగ్గు దొంతరలో..
రావయ్యా రామయ్యా.. పెళ్లి శోభలతో..

వెన్నెల్లో నడిచే మబ్బుల్లాగా..
వర్షంలో తడిసే సంద్రంలాగా..
ఊరేగే పువ్వుల్లో.. చెలరేగే నవ్వుల్లో..
అంతా సౌందర్యమే.. అన్నీ నీ కోసమే..!
వెన్నెల్లో నడిచే మబ్బుల్లాగా..
వర్షంలో తడిసే సంద్రంలాగా..

నాలో ఎన్ని ఆశలో.. అలల్లా పొంగుతున్నవీ..
నీతో ఎన్ని చెప్పినా.. మరెన్నో మిగులుతున్నవీ..
కళ్ళల్లోనే వాలి.. నీలాకాశం అంతా.. ఎలా ఒదిగిందో..
ఆ గగనాన్ని ఏలే పున్నమి రాజు.. ఎదలో ఎలా వాలాడో..
నక్షత్రాలన్నీ ఇలా కలలై వచ్చాయి..
చూస్తూనే నిజమై.. అవి ఎదటే నిలిచాయి..
అణువణువు అమృతంలో తడిసింది అద్భుతంగా..!!

వెన్నెల్లో నడిచే మబ్బుల్లాగా..
వర్షంలో తడిసే సంద్రంలాగా..

ఇట్టే కరుగుతున్నదీ.. మహా ప్రియమైన ఈ క్షణం..
వెనుకకు తిరగనన్నదీ.. ఎలా కాలాన్ని ఆపడం..
వదిలామంటే నేడు.. తీయని స్మృతిగా మారి.. ఎటో పోతుందీ..
కావాలంటే చూడు.. ఈ ఆనందం.. మనతో తనూ వస్తుందీ..
ఈ హాయి అంతా మహా భద్రంగా దాచి..
పాపాయి చేసి.. నా ప్రాణాలే పోసి..
నూరేళ్ళ కానుకల్లే.. నీ చేతికీయలేనా..!!

ఆకాశం అంతఃపురమయ్యింది.. నాకోసం అందిన వరమయ్యింది..
రావమ్మా మహారాణీ.. ఏలమ్మా కాలాన్నీ..
అందీ ఈ లోకమే.. అంతా సౌందర్యమే..!!
ఆకాశం అంతఃపురమయ్యింది.. నాకోసం అందిన వరమయ్యింది..

ఈ పాట వింటుంటే మనసుకెంత హాయిగా ఉంటుందో తెలుసుకోవాలంటే.. విని చూడాల్సిందే.. చెప్పడం కష్టం. మీరూ ఓ సారి మళ్ళీ వినండి. వెన్నెల్లో నడిచే మబ్బుల్లో విహరించి, వర్షంలో తడిసే సంద్రాన్ని తాకి రండి.

మళ్ళీ కలుద్దాం..!!

మాటే మంత్రము...మనసే బంధము...

ఇవ్వాళ్టి మధురగీతం ఇదే..!
మాటే మంత్రము...మనసే బంధము....అనే పాట.
ఈ పాట, ఈ సినిమా చాలా మందికి తెలిసే ఉంటుంది. 1981 లో వచ్చిన ఈ సినిమా అప్పట్లో పెద్ద సంచలనాన్నే సృష్టించింది. ఇలాంటి ప్రేమకథల ట్రెండ్ అప్పట్నించే మొదలయింది.
ఈ సినిమాకి దర్శకత్వం భారతీ రాజా గారు. సంభాషణలు హాస్యబ్రహ్మ జంధ్యాల గారు రాసారు. కార్తీక్, ముచ్చర్ల అరుణ ప్రేమజంటగా నటించారు. కుల మతాలకి అతీతమైన ప్రేమే ఈ సినిమా కథాంశం. ఆ రోజుల్లో కాలేజీ విథ్యార్ధులు ఈ సినిమాని మళ్లీ మళ్లీ చూసి మరీ హిట్ చేశారట. ఈ సినిమాకి అత్యద్భుతమైన సంగీతాన్ని music maestro ఇళయరాజా గారు అందించారు. ఇళయరాజా గారి ఆణిముత్యాల్లో ఈ సినిమా పాటలు ముందువరుసలో ఉంటాయి. సాహిత్యం వేటూరి సుందరరామ్మూర్తి గారు చాలా అర్ధవంతంగా, మధురంగా రాసారు. ఈ పాటని SP బాలు, SP శైలజ పాడారు. ఈ పాట మొదలవగానే అందరు గుర్తు పట్టేస్తుంటారు ఎందుకంటే పాట మొదట్లో హిందూ మంత్రాలు, చర్చి సంగీతం వస్తాయి. ఈ సినిమాలో హీరో హిందువు, హీరోయిన్ క్రైస్తవురాలు. అందుకే అలా symbolic గా పెట్టారన్నమాట.
ఈ పాట వినడానికి వీనుల విందుగా ఉంటుంది. మాటలు నిజంగా మనసుకి హత్తుకునే లాగ ఉంటాయి. ఒకసారి చూద్దామా మరి..!

ఓం శతమానం భవతి శతాయుః పురుష శతేంద్రియ ఆయుశ్శేవేంద్రియే ప్రతిదిష్టతి.....

మాటే మంత్రము... మనసే బంధము...
ఈ మమతే.. ఈ సమతే.. మంగళ వాద్యము...
ఇది కల్యాణం... కమనీయం... జీవితం...

మాటే మంత్రము... మనసే బంధము...
ఈ మమతే.. ఈ సమతే.. మంగళ వాద్యము...
ఇది కల్యాణం... కమనీయం... జీవితం...

ఓ..ఓ..మాటే మంత్రము... మనసే బంధము...

నీవే నాలో స్పందించిన...ఈ ప్రియలయలో శ్రుతి కలిసే ప్రాణమిదే...
నేనే నీవుగా... పువ్వు తావిగా...
సంయోగాల సంగీతాలు విరిసే వేళలో...

నేనే నీవై ప్రేమించిన...ఈ అనురాగం పలికించే పల్లవిదే...
ఎదలో కోవెల ఎదుటే దేవత...
వలపై వచ్చి వారమే ఇచ్చి కలిసే వేళలో...

మాటే మంత్రము... మనసే బంధము...

మీరు కూడా ఒకసారి ఈ పాటను గుర్తు తెచ్చుకుని విని ఆనందించండి.

ప్రేమతో...
మధుర వాణి

ఒక బృందావనం...సోయగం...ఎద కోలాహలం..క్షణ క్షణం...

హాయ్ హాయ్..
ఈ రోజు నేను మీ అందరికి గుర్తు చేయబోయే పాట ఏంటంటే....ఇదే...
ఒక బృందావనం...సోయగం...
ఈ పాట 1988 లో 'పద్మశ్రీ' మణిరత్నం గారు దర్శకత్వం వహించిన ఘర్షణ అనే చిత్రం లోనిది. ఈ చిత్రానికి సంగీతాన్ని ఇళయరాజా గారు అందించారు. 80 లలో వచ్చిన ఈ సినిమా అప్పట్లో చాలా హిట్ అయ్యింది. ఇంక పాటలు ఎంత హిట్ అయ్యాయో ప్రత్యేకంగా చెప్పనక్కరలేదు. ఈ సినిమా పాటలకి చాలా చాలా మంది అభిమానులు ఉంటారు. ఇన్ని సంవత్సరాలయినా ఇప్పటికీ వినడానికి ఇష్టపడుతుంటారు. అలంటి వాళ్ళలో నేను ఒకదాన్ని. ఈ పాటతో పాటు ఈ సినిమాలో మిగిలిన పాటలన్నీ కూడా వాణీజయరాం గారు పాడారు. సుశీల గారు, జానకి గారితో పోల్చుకుంటే వాణీజయరాం గారు తక్కువ పాటలు పాడారు. కానీ, దాదాపుగా ఆవిడ పాడిన ప్రతీ పాట అత్యంత ప్రజాదరణ పొందిన జాబితాలో ఉంటుంది. ఒక బృందావనం... పాటకి సాహిత్యం మణిరత్నం సినిమాలకు ఎప్పుడూ పాటలు రాసే 'రాజశ్రీ' గారు అందించారు. ఈ సినిమా లో ఇద్దరు జంటలు ఉంటారు. ప్రభు-అమల, కార్తీక్-నిరోషా జంటగా నటించారు. ఒకే తండ్రి, వేరు వేరు తల్లులకు పుట్టిన ఇద్దరు యువకుల మధ్యన జరిగే ఘర్షణే ఈ ఘర్షణ సినిమా. మనసుకి హత్తుకునే లాగా తీసారు మణిరత్నం గారు. ఇంక పాట విషయానికి వస్తే...కథానాయిక నిరోషాని కార్తిక్ మొదటిసారి చూసే సమయం లో వచ్చే పాట ఇది. నిరోషాని హీరోయిన్ గా పరిచయం చేసిన మొదటి చిత్రం ఇదే. ఆ అమ్మాయి ఈత కొలనులో ఆడుతూ, పాడుతూ సాగే పాట ఇది. ఈ పాట సంగీతం గానీ, సాహిత్యం గానీ, ఆ సందర్భాన్ని చక్కగా ప్రతిబింబించేలా ఉంటుంది.
పక్షుల కిలకిలా రావాలతో మొదలయీ ఈ పాట ఆద్యంతం ఆహ్లాదంగా సాగుతుంది. మీరే చూడండి ఒకసారి... ఎంత బావుందో...!!
ఒక బృందావనం...సోయగం...ఎద కోలాహలం..క్షణ క్షణం...
ఒకే స్వరం..సాగెను తీయగా..ఒకే సుఖం విరిసేను హాయిగా..
ఒక బృందావనం...సోయగం......

నే సందెవేళ జాబిలీ...నా గీతమాల ఆమనీ...
నా పలుకు తేనె కవితలే...నా కులుకు చిలక పలుకులే...
నే కన్న కలల మేడ నందనం...నా లోని వయసు ముగ్ధ మోహనం...
ఒకే స్వరం..సాగెను తీయగా..ఒకే సుఖం విరిసేను హాయిగా..
ఒక బృందావనం...సోయగం......

నే మనసుపడిన వెంటనే... ఓ ఇంద్రధనుస్సు పొందునే...
ఈ వెండి మేఘమాలనే...నా పట్టుపరుపు చేయనే..
నే సాగు బాట జాజిపూవులే...నాకింక సాటి పోటి లేదులే ..
ఒకే స్వరం..సాగెను తీయగా..ఒకే సుఖం విరిసేను హాయిగా..
ఒక బృందావనం...సోయగం......

మరింకెందుకు ఆలస్యం మీరు కూడా ఒకసారి ఈ పాట గుర్తు చేసుకుని ఆనందించండి.

ప్రేమతో...
మధుర వాణి