మౌనమే మోహన రాగమయే వేళ..

ఒకోసారి నేనొక్కదాన్నే ఉన్నప్పుడో, నిశ్శబ్దంగా ఉండే రాత్రి పూటో పాటలు వినాలనిపిస్తే వినడానికి నాకో ప్రత్యేకమైన ప్లే లిస్టు ఉంటుంది. అందులో ఉండేవన్నీ మంద్రంగా సాగే సంగీతంలో మార్దవంతో నిండిన స్వరాలున్న పాటలే! అదిగో ఆ జాబితాలోని ఒక పాటే ఇది. ఈ పాట హరిహరన్ పాడారు. ఆయన పాడిన ఎన్నో పాటల్లాగే మృదువుగా సాగిపోతుంది ఈ పాట కూడా! సిరివెన్నెల గారి పదాలు ఆయన స్వరంలో అలవోకగా జారిపోతున్నట్టు ఉంటాయి. కీరవాణి గారు స్వరపరచిన బాణీలలో నాకు నచ్చేవాటిల్లో ఈ పాట ముందు వరుసలో ఉంటుంది.

మరుగేల.. నీ మనసుకి ఆ ముసుగేల.. చందమామ లాంటి భామా.. అని అబ్బాయి చెప్తున్నట్టుగా అనిపిస్తుంది నాకు. మాటలకందని భావాలు చూపుల్లో పలుకుతాయని, చూపులు చేరలేని తావులకి ఊహలు చేర్చుతాయని.. ఎంతందంగా చెప్పారో సిరివెన్నెల గారు!
చుట్టూ పూర్తి నిశ్శబ్దంగా ఉన్న పరిసరాల్లో ఈ ఒక్క పాటే చెవులకు వినిపిస్తుంటే ఈ పాటలో రాసినట్టు 'మౌనమే మోహన రాగమయే వేళ..' అనిపిస్తుంటుంది నాకు.

ఈ పాట 1999 లో వచ్చిన 'అల్లుడుగారు వచ్చారు' అనే సినిమాలోది. జగపతిబాబు, హీరా, కౌసల్య నటించగా కీరవాణి సంగీతం అందించారు. ఈ సినిమాలోని పాటలన్నీటికి సిరివెన్నెల గారు సాహిత్యం అందించారు. ఈ సినిమాలోనే బాలు గారు పాడిన 'నోరార పిలిచినా' అనే పాట, కీరవాణి గారు స్వయంగా పాడిన 'రంగురంగు రెక్కల' పాట కూడా బాగుంటాయి. ఈ పాట మీక్కావాలంటే ఇక్కడ చూడండి. ఓసారి విని చూడండి.. మీక్కూడా నచ్చుతుందేమో! :)

మరుగేల.. మబ్బు ముసుగేల..
ఓ చందమామా.. ఓ చందమామా..
మనసున మల్లెలు విరిసిన వేళ..
మమతల పల్లవి పలికిన వేళ..
మౌనమే మోహన రాగమయే వేళ..
మరుగేల.. మబ్బు ముసుగేల..
ఓ చందమామా.. ఓ చందమామా..

మాటకు అందని ఊసులు లేవా చూపులలోనా..
చూపులు చేరని సీమలు లేవా ఊహలలోనా..
కనుచూపులో.. చిగురాశలు.. బరువైన రెప్పల్లో బంధించకు..
మది వీధిలో.. స్వప్నాలకి.. సంకెళ్ళు వేసేటి జంకెందుకు..
ఊయలలూపే మృదుభావాలు.. ఊపిరి తీగను మీటే వేళ..
మౌనమే మోహన రాగమయే వేళ..

మరుగేల.. మబ్బు ముసుగేల..

కాంచన కాంతుల కాంచన బాట కనపడలేదా..
కొమ్మన కూసిన కోయిల పాట వినపడలేదా..
ఉలి తాకిన.. శిల మాదిరి.. ఉలికులికి పడుతోంది ఎదలో సడి..
చలి చాటున.. మరుమల్లెకి.. మారాకు పుడుతోందో ఏమో మరి..
చెంతకు చేరే సుముహుర్తాన.. ఆశలు తీరే ఆనందాన..
మౌనమే మోహన రాగమయే వేళ..

మరుగేల.. మబ్బు ముసుగేల..

గోరువంక వాలగానే గోపురానికి స్వరాల గణ గణా గంటలే మోగనేలా..

'యువరత్న' నందమూరి బాలకృష్ణ గారి సినిమా పాటలు ఓ నాలుగు చెప్పండి అని ఏ తెలుగువారినైనా అడిగితే వెంటనే ఏం సమాధానం వస్తుంది? 'లక్స్ పాపా లక్స్ పాపా లంచ్ కొస్తావా..' అనో, 'నిన్న కుట్టేసినాది మొన్న కుట్టేసినాది గండు చీమ' అనో, 'అందాల ఆడబొమ్మ..' అనో, 'సింహమంటి చిన్నోడే వేట కొచ్చాడే' అనో చెప్తారు కదా! ఎందుకంటే, మరి ఆయన పాటలు అలాంటివే ఎక్కువ పాపులర్ కాబట్టి. కానీ, ఇలాంటి వాటికి భిన్నంగా ఆయన సినీమాల్లోంచి ఒక మెలోడీని నేను మీకు గుర్తు చేస్తున్నా ఇప్పుడు. :-)

అదే 1994 లో వచ్చిన 'గాండీవం' సినిమాలోని 'గోరువంక వాలగానే' అనే పాట. యీ సినిమాలో బాలకృష్ణ సరసన కథానాయికగా రోజా నటించింది. అక్కినేని నాగేశ్వర రావు గారూ, మోహన్ లాల్, శ్రీ విద్య ఇతర తారాగణం. ఇప్పుడు హిందీలో ఎడాపెడా కామెడీ సినిమాలు తీసేస్తున్న ప్రముఖ మళయాళ దర్శకుడు ప్రియదర్శన్ యీ సినిమాకి దర్శకుడు. యీ సినిమాకి MM కీరవాణి గారు స్వరాలందించారు. యీ పాటని కీరవాణి గారి పాటల్లో ఓ ఆణిముత్యం అనుకోవచ్చు.

యీ పాట గురించి తెలిసినవాళ్ళతో పాటుగా తెలియని వాళ్ళు కూడా చాలామందే ఉంటారని నాకనిపించింది. ఇంతకీ నాకీ పాట ఎలా పరిచయం అయిందంటే... చిన్నప్పుడు వేరే ఊర్లో ఉండే మా నాన్న స్నేహితుడు ఒకాయనకి ఆడియో షాప్ ఉండేది. ఆయన దృష్టిలో మంచి పాటలు అనిపించినవన్నీటిని ఏరి కూర్చి ప్రత్యేకంగా నాన్న కోసమని కొన్ని కేసెట్లు రికార్డ్ చేసి పెట్టేవారు ఆయన. నాన్న ఆ ఊరెళ్ళినప్పుడల్లా కొత్త కేసెట్లు పట్టుకొచ్చేవారు. చిన్నప్పుడు మేమెప్పుడూ పెద్దగా సినిమాలు చూసింది లేదు. కానీ, పాటలు మాత్రం చాలానే వినేవాళ్ళం. అలా అప్పట్లో యీ పాట విన్నప్పుడు పదాలు పెద్దగా అర్ధం కాకపోయినా కూడా బాగా నచ్చేసింది మా ఇంట్లో అందరికీ. చాలా యేళ్ళ తరవాత మళ్ళీ ఇంటర్నెట్లో వెతికి పట్టుకున్నా యీ పాటని. నాకు చాలా ఇష్టమైన పాటల్లో ఇదొకటి :-)

యీ పాట ట్యూన్ ఎంత బాగుంటుందో పాటలో అలవోకగా పారాడే తెలుగు పదాలు అంతకంటే అందంగా అనిపిస్తాయి. మహానుభావుడు వేటూరి గారు ఏ స్వర్గాన ఉన్నారో ఉన్నారో గానీ మనకిలాంటి అందమైన తెలుగు పాటల్ని మిగిల్చి వెళ్ళిపోయారు. యీ పాటలో సాహిత్యం వింటుంటే నిజంగా చెవిలో తేనె పోసినట్టుంటుంది. ఏ వాక్యం బాగుంది అని చెప్పాలంటే, పాటలో ఉన్న ప్రతీ ఒక్క లైను గురించీ చెప్పాల్సి వస్తుంది. :-) ఒక్కమాటలో చెప్పాలంటే అందమైన తెలుగు పదాలతో సయ్యాట ఆడించారు వేటూరి గారు యీ పాటలో. ఓసారి క్రిందన రాసిన పాట సాహిత్యం చూస్తే మీరూ యీ విషయం ఒప్పుకుంటారు.

ఇహ అంతందమైన తెలుగు పదాలు సుస్పష్టంగా, స్వచ్ఛంగా పలికే మన బాలు గారి స్వరంలో ఎంత తియ్యగా వినిపించాయో స్వయంగా వింటే గానీ అర్ధం కాదు ఎవరికైనా! యీ పాటలో బాలు గారితో పాటు చిత్ర గారు, శ్రీ కిరణ్ కూడా గొంతు కలిపారు. మీకూ యీ పాట కావాలంటే ఇక్కడ చూడండి.

గోరువంక వాలగానే గోపురానికి స్వరాల గణ గణా గంటలే మోగనేలా..
గోపబాలుడొచ్చినాక గోకులానికి పెదాల కిల కిలా పువ్వులే పుట్టలేదా..
బాలకృష్ణుడొచ్చినప్పుడే వయ్యారి నందనాలు నాట్యమాడగా..
వారసుడ్ని చూసినప్పుడే వరాల వాంఛలన్ని పల్లవించగా..
నందుడింట చిందులేసే అందమైన బాలుడే తనవాడై..
గోరువంక వాలగానే గోపురానికి స్వరాల గణ గణా గంటలే మోగనేలా..
గోపబాలుడొచ్చినాక గోకులానికి పెదాల కిల కిలా పువ్వులే పుట్టలేదా..

ఏటి మనుగడ కోటి అలలుగ పొంగు వరదల వేగానా..
పడిలేచు అలలకు తీపి కలలకు లేని అలసట నీకేలా..
నల్ల నల్ల నీళ్ళల్లోనా ఎల్లకిలా పడ్డట్టున్న అల్లో మల్లో ఆకాశాన చుక్కల్లో..
అమ్మాయంటే జాబిల్లమ్మ అబ్బాయంటే సూరీడమ్మా ఇంటి దీపాలవ్వాలంట దిక్కుల్లో..
ఎవరికివారే… యమునకు నీరే….
రేవు నీరు నావదంట నావ తోడు రేవుదంట పంచుకుంటే..

గోరువంక వాలగానే గోపురానికి స్వరాల గణ గణా గంటలే మోగనేలా..
గోపబాలుడొచ్చినాక గోకులానికి పెదాల కిల కిలా పువ్వులే పుట్టలేదా..

ప్రేమ ఋతువులు పూలు తొడిగిన తేనె మనసుల నీడల్లో..
మురిపాల నురగలు పంటకెదిగిన బాల సొగసుల బాటల్లో..
బుగ్గందాల ఇల్లు నవ్వే సిగ్గందాల పిల్ల నవ్వే.. బాలయ్యొచ్చి కోలాటాడే వేళల్లో..
పైరందాల చేలు నవ్వే పేరంటాల పూలు నవ్వే.. గోపెమ్మొచ్చి గొబ్బిళ్ళాడే పొద్దుల్లో..
పరవశమేదో.. పరిమళమాయే..
పువ్వు నవ్వే దివ్వె నవ్వే.. జివ్వుమన్న జన్మ నవ్వే పాడుతుంటే..

గోరువంక వాలగానే గోపురానికి స్వరాల గణ గణా గంటలే మోగనేలా..
గోపబాలుడొచ్చినాక గోకులానికి పెదాల కిల కిలా పువ్వులే పుట్టలేదా..
బాలకృష్ణుడొచ్చినప్పుడే వయ్యారి నందనాలు నాట్యమాడగా..
వారసుడ్ని చూసినప్పుడే వరాల వాంఛలన్ని పల్లవించగా..
నందుడింట చిందులేసే అందమైన బాలుడే తనవాడై..

రాలిపోయే పువ్వా.. నీకు రాగాలెందుకే..! తోటమాలి నీ.. తోడు లేడులే..!!

నమస్కారం..!
ఈ రోజు కూడా మిమ్మల్నందరినీ మరోసారి ఆవేదనలోకి తీసుకెళ్ళే పాటను గుర్తు చేస్తున్నాను. మొన్ననే 'మాతృదేవోభవ' సినిమాలోని 'వేణువై వచ్చాను' అన్న పాట గురించి మాట్లాడుకున్నాం కదా..! అయితే అది వినగానే చాలా మంది స్నేహితులకి 'రాలిపోయే పువ్వా నీకు రాగాలెందుకే' అన్న ఈ పాట కూడా గుర్తొచ్చింది. ఈ పాట రాగాన్ని, భావాన్ని కూడా ఒకసారి గుర్తు చేసుకుందామని నన్ను అడిగారు. అసలు ఈ పాటను గురించి ఏదన్నా చెప్పాలనుకున్నా గానీ మాటలు బయటికి రావు. చాలా బాధగా ఉంటుంది. ఏముందిలే.. అది ఒక సినిమానే కదా...మరీ అంత లీనమైపోయి బాధపడడం ఎందుకులే..అని ఎంత సర్దిచెప్పుకున్నా గానీ.. మాములుగా అనిపించదు. నిజంగానే మన కళ్ళముందే ఒక కుటుంబానికి అలా జరిగింది అన్నట్టుగా ఉంటుంది. మనకి అలా అనిపించేలా సినిమా తీసిన దర్శకులు k.అజయ్ కుమార్ గారికే ఆ గొప్పతనం చెల్లుతుంది.

ఈ సినిమాకి మాతృక మలయాళంలో వచ్చిన 'అక్షధూడు' అనే సినిమా. ఇలాంటి నిజ జీవితానికి దగ్గరగా ఉండే సినిమాలు తీయడంలో మళయాళ సినీ పరిశ్రమ తరవాతే ఎవరైనా..!
అన్నట్టు..ఒకఆసక్తికరమైన సంగతి ఏంటంటే..మలయాళంలో కూడా మాధవే నటించింది. సినిమా మొదటి సగంలో ఎంత ముద్దుగా, ముచ్చటగా ఉంటుందో మాధవి.. రెండో సగంలో అంత దయనీయంగా ఉంటుంది. ఈ సినిమాలో నటనని గురించి మాధవిని ఎంత పొగిడినా సరిపోదు అసలు. మాధవి సినీజీవితంలోనే ఎప్పటికీ నిలిచిపోయే పాత్ర అని విమర్శకుల ప్రశంసలు సైతం పొందింది. ప్రముఖ నిర్మాత KS రామారావు గారు మలయాళ సినిమా చూసి అనువాద హక్కులు తీసుకుని తెలుగులో తీసారు. అందువల్లే మనం ఇంత మంచి సినిమాని తెలుగులో చూడగలిగాము.

ఈ సినిమాకి కీరవాణి గారి సంగీతం, వేటూరి గారి సాహిత్యం ప్రాణం లాంటివి. ఈ సినిమాలో 'వేణువై వచ్చాను' అనే పాట స్వతహాగా వేటూరి గారికి బాగా నచ్చిందట. కానీ 'రాలిపోయే పువ్వా' పాటకి వేటూరి గారికి జాతీయ అవార్డు వచ్చింది. కృష్ణ గారి 'అల్లూరి సీతారామరాజు' సినిమా తరవాత మన తెలుగు పాట సాహిత్యానికి మళ్ళీ జాతీయ అవార్డు రావడం ఈ సినిమాతోనే.
కేవలం 37 లక్షల బడ్జెట్ తో తీసిన ఈ సినిమా మొదటి రెండు వారాలు థియేటర్లన్నీ ఖాళీ ఖాళీగా ఉన్నాయట. మూడోవారం నుంచి జనాలు వరుస కట్టారు. తరవాత ఏమి జరిగిందో మనందరికీ తెలుసు కదా... కన్నీళ్లు తుడుచుకోడానికి ఖర్చీఫ్ లు కూడా పంచిపెట్టారు. అలా చివరికి కోట్లు వసూలు చేసింది ఈ సినిమా.

ఇంక ఈ పాట సందర్భానికి వస్తే.. ఇక తను కూడా చనిపోతాను అని తెలిసిపోయాక తమలాగా అనాధల్లాగా పెరగకూడదని పిల్లలందరినీ దత్తత ఇస్తుంది మాధవి. సినిమా మొత్తంలోకీ మనల్ని బాగా కదిలించే సన్నివేశాలు ఇవే. చివరగా దీపావళికి కుటుంబం అంతా ఒకసారి కలవాలని మళ్ళీ పిల్లలని పిలవడానికి వెళ్తుంది. అప్పుడే ఈ పాట వస్తూ ఉంటుంది. మళ్ళీ తనకి తోడుగా అవిటి వాడవడం వల్ల తన వద్దే మిగిలిపోయిన కొడుకు. ఈ బాబుతో పాటు పుట్టిన ఇంకో కవల పిల్లాడిని కలిసినప్పుడు పడే ఆవేదనా.. :( :( హమ్మో... నాకు చాలా ఏడుపు వచ్చేస్తుంది. ఇంక ఆపేస్తున్నాను ఆ సందర్భాన్ని గురించి చెప్పడం :(

ఈ పాటలోని ప్రతీ పదం కూడా అస్తమించబోతున్న శారద (పాత్ర పేరు) జీవితాన్ని ప్రతిబింబిస్తూ ఉంటుంది. కానీ, ఇలా ప్రతీ పదంలో ఇన్ని రకాలుగా.. భావాన్ని వ్యక్తీకరించడం వేటూరి గారికే చెల్లింది. అంత మహానుభావుడు మన తెలుగుదేశంలో జనించడం నిజంగా మనందరం చేసుకున్న పుణ్యం. కీరవాణి గారు పాటలోని భావాన్నంతా గొంతులో నింపి ఈ పాటను ఆలపించారు.

మరోసారి వేటూరి గారి ఈ అద్భుత సాహిత్యం మీ కోసం..

రాలిపోయే పువ్వా నీకు రాగాలెందుకే..!

తోటమాలి నీ.. తోడు లేడులే..!

వాలిపోయే పొద్దా నీకు వర్ణాలెందుకే..!

లోకమెన్నడో చీకటాయెలే ..!
నీకిది తెలవారని రేయమ్మా..!

కలికీ మా చిలకా.. పాడకు నిన్నటి నీ రాగం..!

రాలిపోయే పువ్వా నీకు రాగాలెందుకే..!

తోటమాలి నీ తోడు లేడులే..!

వాలిపోయే పొద్దా నీకు వర్ణాలెందుకే..!

లోకమెన్నడో చీకటాయెలే ..!

చెదిరింది నీ గూడు గాలిగా... చిలకా గోరింకమ్మ గాథగా...

చిన్నారి రూపాలు కన్నీటి దీపాలు కాగా..ఆ..ఆ..

తనవాడు తారల్లో చేరగా.. మనసు మాంగల్యాలు జారగా..

సింధూర వర్ణాలు తెల్లారి చల్లారి పోగా...!

తిరిగే భూమాతవు నీవై.. వేకువలో వెన్నెలవై..

కరిగే కర్పూరము నీవై.. ఆశలకే హారతివై..

రాలిపోయే పువ్వా నీకు రాగాలెందుకే..!

తోటమాలి నీ.. తోడు లేడులే..!

వాలిపోయే పొద్దా నీకు వర్ణాలెందుకే..!

అనుబంధమంటేనే అప్పులే.. కరిగే బంధాలన్నీ మబ్బులే..

హేమంత రాగాల చేమంతులే.. వాడిపోయే.. ఆ..ఆ..

తన రంగు మార్చింది రక్తమే.. తనతో రాలేనంది పాశమే..

దీపాల పండక్కి దీపాలే కొండెక్కి పోయే...!

పగిలే ఆకాశము నీవై.. జారిపడే జాబిలివై..

మిగిలే ఆలాపన నీవై.. తీగ తెగే వీణియవై..

రాలిపోయే పువ్వా నీకు రాగాలెందుకే..!

తోటమాలి నీ తోడు లేడులే..!

వాలిపోయే పొద్దా నీకు వర్ణాలెందుకే..!

లోకమెన్నడో చీకటాయెలే ..!

భారమైన మనసుతో.. సెలవు తీసుకుంటున్నాను..!