జర్మనీలో క్రిస్మస్ మార్కెట్ - గ్లూ వైన్ విశేషాలు

జర్మనీలో క్రిస్మస్ వేడుకల గురించి ఈ రోజు కొన్ని కబుర్లు చెప్తాను మీకు. చాలా పాశాత్య దేశాల్లోలాగానే.. జర్మనీలో కూడా క్రిస్మస్, ఈస్టర్ రెండు పెద్ద పండుగలు. డిసెంబర్ నెల రావడంతోటే.. ఎక్కడ చూసినా క్రిస్మస్ కళ కనిపిస్తూ ఉంటుంది. బాగా అలంకరించిన క్రిస్మస్ చెట్లు, క్రిస్మస్ తాత బొమ్మలు, ఈ సమయంలోనే ప్రత్యేకంగా వచ్చే ఎన్నో రకాల చాక్లెట్లు, బిస్కెట్లు.. ఇంకా ఎన్నెన్నో... విశేషాలతో ఎక్కడ చూసినా పండుగ వాతావరణం కనిపిస్తుంది.

జర్మనీలో ప్రత్యేకంగా డిసెంబర్ మొదటి, రెండో వారాల నుంచి 'క్రిస్మస్ మార్కెట్లు' మొదలవుతాయి. ఏ ఊరికి తగట్టుగా ఆ ఊరిలో arrangements ఉంటాయి. పెద్ద పెద్ద సిటీల్లో పెద్ద పెద్ద మార్కెట్లు ఉంటాయన్నమాట. ఇవి మన ఎగ్జిబిషన్ టైపులో ఉంటాయి కొంచెం. కాకపోతే.. gaint wheel లాంటివి ఉండవు ఈ క్రిస్మస్ మార్కెట్లో.. చిన్న చిన్న స్టాల్స్ ఉంటాయి. కొన్నీటిల్లో బొమ్మలు, ఊలుతో తయారు చేసిన దుస్తులు, చాక్లెట్ పూత పూసిన పండ్లు, ఇంకా మామూలు శాండ్ విచ్ లాంటి తిండి పథార్ధాలు వగైరా ఉంటాయి. అన్నీటికంటే ప్రత్యేకమైన item.. అందరూ ప్రత్యేకంగా వెళ్ళేది దేనికోసం అంటే.. అదే Glühwein (గ్లూ వైన్).

జర్మనీలో క్రిస్మస్ టైం కి బాగా మంచు పడుతుంది కాబట్టి. వాతావరణం చాలా చలిగా ఉంటుంది. ఈ సమయంలో బయట క్రిస్మస్ మార్కెట్ కెళ్ళి వేడి వేడిగా Glühwein తాగి పండగ చేసుకుంటారన్న మాట :) అసలు వైన్ వేడి వేడిగా ఉండడం ఏంటి అనుకుంటున్నారా.. అదే మరి దీని ప్రత్యేకత. ఈ వైన్ ని ఈ పండగప్పుడు మాత్రమే తాగుతారు. ఎలా తయారు చేస్తారో చెప్తాను. ఈ వైన్ ని అమ్మే స్టాల్లో అప్పటికప్పుడు తయారు చేసి కప్పుల్లో పోసి ఇస్తూ ఉంటారు. ఒక చిన్న సైజు గంగాళం లాంటి దాంట్లో రెడ్ వైన్ పోసి సన్నని మంట మీద వేడి చేస్తారు. కాస్త వేడి అయ్యాక అందులో చక్కరతో పాటు చాల మసాలా దినుసులు వేస్తారు. అవేంటంటే.. దాల్చిన చెక్క, లవంగాలు, ఇంకా మనం బిర్యానిలో వేసే జాజి పువ్వు, ఇంకా కొన్ని ఉంటాయి కదా (నాకు అన్నీటి పేర్లు తెలిదు :) అవన్నీ వేసి ఇంకాసేపు మరిగిస్తారు. అలాగే నారింజ పండు, నిమ్మ కాయలని తొక్కతో పాటే ముక్కలుగా కోసి అవి కూడా వేస్తారు. కొంచెం tangy flavor రావడానికన్నమాట.. బాగా వేడి చేసాక వేడి వేడి పొగలు కక్కుతున్న Glühwein ని కప్పుల్లో పోసి ఇస్తారన్న మాట. చిన్న స్టాల్స్ లోనే అమ్ముతారు కాట్టి బయట నుంచుని తాగడమే.. ఆ వేడి కప్పు చుట్టూ చేతులు పెట్టుకుని.. చక్కగా వేడి వేడి 'గ్లూ వైన్' ని సేవిస్తారన్నమాట. అదీ సంగతి.

పోయిన వారం.. మా ఇన్స్టిట్యూట్ లో అందరూ ఒకరోజు సాయంత్రం క్రిస్మస్ మార్కెట్ కి వెళ్దాం అందరం Glühwein తాగడానికి అన్నారు. ప్రతీ సంవత్సరం ఈ రోజుల్లో.. చిన్నా, పెద్దా తేడా లేకుండా బాసుతో సహా అందరం వెళ్తూ ఉంటామన్న మాట..! ఆ రోజు మేము వెళ్దామనుకునే టైం కి మంచుపూల వర్షం మొదలయ్యింది. అలా ఆ మంచులోనే వెళ్ళాం అందరం. మా ఇన్స్టిట్యూట్ లో అంతకుముందు ఒక వారం క్రితమే ఒక అబ్బాయి పెళ్లి అయ్యింది. ఆ సందర్భంగా వాళ్ల ఆవిడని కూడా తీసుకొచ్చాడు. వాళ్ల పెళ్లి అయిన సందర్భంగా మా అందరికీ ఆ రోజు Glühwein పార్టీ ఇచ్చారన్న మాట :)

ఇదంతా బానే ఉంది గానీ.. మరి పాపం వైన్ తాగని (తాగడం ఇష్టం లేని) నా లాంటి వాళ్ల పరిస్థితి ఏంటీ.. అంటే.. kinder-punsch అని ఇంకోటి ఉంటుంది. అచ్చం Glühwein లాగానే చేస్తారు.. కాకపోతే ఇందులో వైన్కి బదులుగా ఆపిల్ రసం కానీ, ద్రాక్ష రసం గానీ వేసి చేస్తారు. kinder-punsch అంటే Child-punch అన్నమాట.. :) అలా అని పిల్లల కోసం మాత్రమే అనుకునేరు.. పెద్దవాళ్ళే ఎక్కువగా తాగుతారు. కాకపోతే.. పిల్లలు కూడా తాగగలిగింది అన్నమాట :)
రుచి మరీ గొప్పగా ఉంటుందా అంటే.. ఆ చలిలో.. వేడి వేడిగా.. తీయ తీయగా.. స్పైసీ గా అదొక వెరైటీగా ఉంటుందన్నమాట :)

అదీ జర్మనీ లో Glühwein గాథ.

నాకు బాగా నచ్చింది ఇంకోటి ఏంటంటే.. బాదం పప్పులకి చక్కర పూత వేసి.. వేయించి అమ్ముతారు (sugar coated roasted almonds). నాకు అవి చాలా ఇష్టం.. ఎంత బావుంటాయో :)

ఆ రోజు బాగా చలిగా ఉండడం వల్ల నేను ఏమీ ఫొటోస్ తీయలేదు. మళ్లీ ఒక రెండు మూడు రోజుల్లో వెళ్ళే ప్లాన్ ఉంది. Munich లో ఉన్న పేద్ద.. క్రిస్మస్ మార్కెట్ కి.. అపుడు తప్పకుండా ఫొటోస్ తీసి మీకు కూడా చూపిస్తాను..

మీ అందరికీ కూడా.. క్రిస్మస్ శుభాకాంక్షలు.

ఇంక సెలవు..
మధుర వాణి