నిదరే కల ఐనది.. కలయే నిజమైనది.. బతుకే జత ఐనది.. జతయే అతనన్నది..!!

చాలా చాలా రోజుల తరవాత ఇవాళ నేనొక పాట గురించి రాస్తున్నా నా బ్లాగులో. అసలు పాటల గురించి చెప్పమని నన్నెవరైనా అడగాలే గానీ, ఇహ ఆ తరవాత నే చెప్పేది వినలేక 'ఎందుకు కదిలిచ్చాంరా బాబూ' అనుకోవాల్సివచ్చేలాగా చెప్పుకుంటూ పోతూనే ఉంటాను. ఎందుకంటే పాటలంటే నాకంత ప్రేమ మరి.! నన్ను మురిపించి మైమరిపించే పాటలు ఒకటా రెండా..బోలెడున్నాయి మరి.. అంచేత చెప్పుకుంటూ వెళ్తే చాంతాడంతో.. చైనా వాల్ అంతో అవుతుంది ఆ పాటల లిస్టు. అసలు మీకో సంగతి తెల్సా.? ఈ బ్లాగు మొదలుపెట్టినప్పటి నా ఆలోచన నాకిష్టమైన పాటల గురించిన అనుభూతులు పంచుకుందామనే.. ఒకవేళ నాలా స్పందించే వాళ్ళుంటే.. అది మరింత సంతోషం కదా..! అలా అనుకుని మొదలెట్టాక మొదట్లో చాలా పాటల గురించి రాశాను. ఆ తరవాత నా బుర్రలో పురుగు తిరిగినప్పుడల్లాఏదో ఒకటి రాస్తూ, మీ బుర్రలు తింటూ.. క్రమంగా నా బ్లాగు కాస్తా ఒక కలగూరగంపలా తయారయింది :) సరే.. ఇక సుత్తి ఆపి అసలు సంగతి.. అదే పాట గురించి చెప్పమ్మా.. అనుకుంటున్నారా.? వస్తున్నా.. అక్కడికే వస్తున్నా.. వచ్చేశా :)

ఆ మధ్య (అంటే చాలా రోజుఅల క్రితం అని).. తమిళ్ హీరో సూర్య తండ్రి - కొడుకు పాత్రల్లో నటించిన 'సూర్య సన్నాఫ్ కృష్ణన్' అనే సినిమా ఒకటి వచ్చింది. మీరు చూసారా.? చాలా మందికి సినిమా పెద్దగా నచ్చలేదు (నాకు తెలిసిన వాళ్ళకి). నాకు మాత్రం తెగ నచ్చేసింది సినిమా. వరుసగా రెండ్రోజుల్లో రెండు సార్లు చూసాను :) కాకపోతే, నేను ఇంట్లో డీవీడీ చూసాను కానీ, అదే సినిమా హాల్లో అయితే కొంత బోర్ కొట్టే అవకాశం ఉంది.. సినిమా నిడివి దాదాపు మూడుగంటలు అవడం చేత. స్థూలంగా సినిమా కథ చెప్పాలంటే.. తండ్రి చనిపోయిన వేళ ఒక కొడుకు తండ్రి తననెలా అడుగడుగునా తోడుగా ఉండి నడిపించాడు అనేది తనకు తాను గుర్తుకు తెచ్చుకుంటూ కథంతా మనకి చెప్తున్నట్టుగా ఉంటుంది. ఈ సినిమా తీయాలనుకునే సమయంలో వాళ్ల నాన్నగారు చనిపోవడం వల్ల దర్శకుడు బాగా కలత చెందారట. ఆ తరవాత 'నాన్నతో ఒక కొడుకుకున్న అనుబంధం' అనే ఈ అంశాన్నే తీసుకుని ఈ సినిమాని తీసారు దర్శకుడు గౌతం వాసుదేవ్ మీనన్. ఈయన గతంలో సూర్య హీరోగా వచ్చిన 'కాక్కా కాక్కా' (తెలుగులో వెంకీ 'ఘర్షణ గా వచ్చింది), మాధవన్ 'చెలి', కమలహాసన్ నటించిన 'రాఘవన్ అనే సినిమాలకి దర్శకత్వం వహించారు. ఇవన్నీ తమిళ సినిమాలే అయినా కూడా తెలుగు అనువాదాలు కూడా విజయవంతమయ్యాయి. ఈ సినిమాలన్నీ కూడా సంగీతపరంగా బాగా ఆకట్టుకున్నాయి. సంగీతదర్శకుడు హారిస్ జయరాజ్, గౌతం మీనన్ కలయికలో వచ్చిన పాటలన్నీ కూడా చాలావరకు బావుండేవే. కానీ, సూర్య సన్నాఫ్ కృష్ణన్ సినిమా సమయంలో వారిరువురికీ ఏవో అభిప్రాయబేధాలు రావడం వల్ల సమీప భవిష్యత్తులో మళ్ళీ వీళ్ళిద్దరూ కలిసి పని చేసే అవకాశం లేదట.

సరే.. మళ్ళీ ఈ సినిమా విషయానికొస్తే కథానాయకుడు తొలిచూపులోనే ఒక అమ్మాయిని ప్రేమించి చాలా కష్టపడి ఆ అమ్మాయి ప్రేమని పొందుతాడు. దురదృష్టవశాత్తూ ఆ అమ్మాయి చనిపోవడం.. మన కథానాయకుడు విపరీతమైన డిప్రెషన్లోకి వెళ్ళడం జరుగుతుంది. హీరో ఇంటిపక్కనే ఉండే హీరో చెల్లెలి ప్రాణ స్నేహితురాలు స్కూల్ రోజుల్నించే హీరోని ప్రేమిస్తూ ఉంటుంది. ఆ అమ్మాయి మీద తనకున్న ఇష్టాన్ని హీరో తనకుతాను తెలుసుకుని ఆ అమ్మాయిని స్వీకరించే సమయంలో ఒక పాట వస్తుంది. ప్రస్తుతానికి నేను నేను చెప్పేది ఆ పాట గురించే. 'నిదరే కల ఐనది. కలయే నిజమైనది' అనే పల్లవితో సాగుతుంది పాట. ఇకపోతే ఈ పాట పాడిన అమ్మాయి పేరు సుధా రఘునాథన్. ఈ గాయని పేరు ఇదివరకు నేనెక్కడా వినలేదు. ఇదే మొదటిపాటేమో తెలీదు మరి. ఈ అమ్మాయి తెలుగు అమ్మాయి కాకపోయినా పాట భావాన్నంతా గొంతులో నింపి ఎంత మధురంగా పలికించిందో ఒకసారి వింటే గానీ అర్ధం కాదు. ఈ పాట సంగీతం కంటే కూడా, గాత్రం మీదనే ఎక్కువ ఆధారపడి ఉంది. పాటలో అంతర్లీనంగా, మృదువుగా సాగిపోతుంటుంది సంగీతం. సినిమాలో కథానాయిక ఎన్నో ఏళ్లుగా హీరోపై ప్రేమని పెంచుకుని, అతని సంతోషాల్నీ, వేదనల్నీ అన్నిటినీ ప్రేమిస్తూ..అతని ప్రేమ కోసం మౌనంగా సాగించిన సుధీర్ఘ నిరీక్షణ అనంతరం..అతని ప్రేమని పొందిన పరవశంలో తన్మయత్వంతో పాడే పాట ఇది. చిత్రీకరణ కూడా చాలా బావుంటుంది. ఈ సినిమాలో నటించిన ప్రతీ ఒక్కరు అద్భుతంగా తమ తమ పాత్రల్లో ఒదిగిపోయారు. నిజంగా జరిగేది చూస్తున్నామేమో అన్న అనుభూతి కలుగుతుంది మనకు. ఈ గొప్పతనం అంతా ఖచ్చితంగా దర్శకుడికే చెందుతుంది.

ఈ సినిమాలో అన్నీ పాటలు బాగానే ఉన్నా, అన్నీటికంటే ఈ పాట నాకు చాలా చాలా నచ్చింది. డబ్బింగ్ పాటలయినా కూడా వేటూరి గారు చాలా కష్టపడి ఒక మంచి రూపు తీసుకొచ్చారు పాటలకు అనిపిస్తుంది మనకి. నిజానికి స్నేహితుడొకరు మొదట ఈ పాట బావుందని చెప్తే..నేను విని 'హమ్మో.. డబ్బింగ్ పాట అని బాగా తెలిసిపోతుంది. నాకు ఎక్కడం కష్టం' అన్నాను. కానీ, సినిమా చూసిన తరువాత పాటలన్నీ తెగ నచ్చేసాయి నాకు. వరుసగా కొన్నిరోజులవరకూ అవే అవే విన్నాను. మీరూ ప్రయత్నించి చూడండి. అన్నట్టూ.. ఈ సినిమా గురించి మరో మాట..జై చిరంజీవ, అశోక్ తదితర చిత్రాల్లో నటించిన బాలీవుడ్ తెలుగమ్మాయి సమీరా రెడ్డి ఈ సినిమాలో ఒక హీరోయిన్. మిగతా సినిమాలు చూసి ఈ సినిమా చూస్తే.. అసలు ఆ అమ్మాయేనా అనే సందేహం వచ్చినా ఆశ్చర్యం లేదు. అంత చక్కగా ఉంటుంది ఆ అమ్మాయి ఈ సినిమాలో. వీలైతే ఈ సినిమా చూడండి. పాటలు మాత్రం తప్పకుండా విని చూడండి. సాహిత్యం క్రింద ఇస్తున్నాను చూడండి.

నిదరే కల ఐనది.. కలయే నిజమైనది..
బతుకే జత ఐనది.. జతయే అతనన్నది..
మనసేమో ఆగదు.. క్షణమైన తోచదు..
మొదలాయే.. కథే ఇలాఆఆఆఆ..

నిదరే కల ఐనది.. కలయే నిజమైనది..
బతుకే జత ఐనది.. జతయే అతనన్నది..
మనసేమో ఆగదు.. క్షణమైన తోచదు..
మొదలాయే.. కథే ఇలాఆఆఆఆ..

వయసంతా వసంత గాలి.. మనసనుకో.. మమతనుకో..
ఎదురైనది ఎడారి దారి.. చిగురులతో.. చిలకలతో..
యమునకొకే సంగమమే.. కడలి నది కలవదులే..
హృదయమిలా అంకితమై.. నిలిచినది.. తనకొరకే..
పడిన ముడి.. పడుచోడి.. ఎద లో చిరు మువ్వల సవ్వడి..

నిదరే కల ఐనది.. కలయే నిజమైనది..
బతుకే జత ఐనది.. జతయే అతనన్నది..
మనసేమో ఆగదు.. క్షణమైన తోచదు..
మొదలాయే.. కథే ఇలాఆఆఆఆ..

అభిమానం అనేది మౌనం.. పెదవులపై పలకదులే..
అనురాగం అనేసరాగం.. స్వరములకే దొరకదులే..
నిన్ను కలిసిన ఈ క్షణమే.. చిగురించే మధు మురళి..
నిను తగిలిన ఈ తనువే.. పులకరించే ఎద రగిలి..
యెదుట పడి కుదుటపడే.. మమకారపు నివాళి లే ఇది..

నిదరే కల ఐనది.. కలయే నిజమైనది..
బతుకే జత ఐనది.. జతయే అతనన్నది..
మనసేమో ఆగదు.. క్షణమైన తోచదు..
మొదలాయే.. కథే ఇలాఆఆఆఆ..