కొత్త బంగారు లోకం

ఎప్పుడెప్పుడు గబగబా వారాలు క్షణాల్లా గడిచిపోతాయా అని ఎదురుచూస్తుంటే ఎనిమిది యుగాల్లా గడిచినట్టనిపించిన ఎనిమిది నెలలు..

అంతటి భారమైన ఎదురుచూపులకి అద్భుతమైన అర్థాన్నిచ్చిన అపురూప క్షణాలు..
పుట్టి బుద్ధెరిగాక అనుభవైక్యమైన భావాలన్నీ మొత్తం ఒక్కేసారి ఎదురై ఉక్కిరిబిక్కిరి చేసి అసలే భావమూ లేదేమోనన్న వింత సరికొత్త మనఃస్థితిలో..

అప్పుడే పుట్టిన బుజ్జాయిని చూసుకున్న తల్లిని అడిగితే తొలిచూపులో ప్రేమలో పడిపోవడం అంటే ఏంటో చెప్తుంది - అని ఎవరో చెప్పిన మాట స్వానుభవంలోకి వచ్చిన రోజు..

అదిగో.. ఆ రోజు నుంచీ సూర్యోదయాలు, చంద్రోదయాలు ఎప్పుడవుతున్నాయో, కేలండరులోని అంకెలు ఎలా మారిపోతున్నాయోనన్న ఊసే లేకుండా, కొత్తగా వచ్చిన ఈ చిన్ని ప్రపంచానికి ముందున్న నా పాత ప్రపంచాన్ని పూర్తిగా మర్చిపోతూ..
అసలు ఇంతకీ కొత్తగా పుట్టింది బుజ్జిగాడొక్కడేనా, నేను కూడానా అన్న తలంపులో గడిపేస్తూ..... :-)

ఎన్నాళ్ళుగానో నా బ్లాగులో ఏమీ రాయకపోయినా నన్నూ, నా రాతలనీ ఎంతో అభిమానంగా తలచుకుంటున్న మిత్రులందరి కోసం ఈ చిన్న పలకరింపు.. :-)